ഹൈദരാബാദ്: കാസിനോ ഉടമ ചികോടി പ്രവീൺ കുമാറിന്റെ വീട്ടിൽ നടന്ന റെയ്ഡിനിടെ വിചിത്ര മൃഗങ്ങളെ കണ്ടെത്തി. തെലങ്കാനയിലെ രംഗറെഡ്ഡി ജില്ലയിലുള്ള ചികോടിയുടെ ഫാംഹൗസിൽ നിന്നാണ് അപൂർവ്വമായ വിദേശ മൃഗങ്ങളെ വനംവകുപ്പ് കണ്ടെത്തിയത്.
മംഗൂസ്, ഭീമൻ നായകൾ, എട്ടുകാലികൾ, ഒട്ടകപക്ഷി, ഇഗ്വാന, പാമ്പുകൾ തുടങ്ങി വിവിധതരത്തിലുള്ള വിദേശ മൃഗങ്ങളെ ഫാംഹൗസിൽ നിന്നും വനംവകുപ്പ് കണ്ടെത്തിയിരുന്നു. മൃഗങ്ങളെ പരിപാലിക്കുന്നതിൽ വീഴ്ച വരുത്തിയിട്ടുണ്ടോയെന്ന കാര്യം ഉദ്യോഗസ്ഥർ പരിശോധിച്ചുവരികയാണ്.
അദ്ദേഹത്തിന്റെ വസതിയിൽ എൻഫോഴ്സ്മെന്റ് ഉദ്യോഗസ്ഥർ റെയ്ഡ് നടത്തിയതിന് പിന്നാലെയാണ് ഫാം ഹൗസിൽ വനംവകുപ്പ് പരിധോനയ്ക്കായി എത്തിയത്. ഗോവ, നേപ്പാൾ, ബാങ്കോക്ക്, ശ്രീലങ്ക, ഇന്തോനേഷ്യ തുടങ്ങിയ സ്ഥലങ്ങളിൽ ചികോടി പ്രവീൺ കുമാർ നടത്തുന്ന കാസിനോയിലെ ചൂതാട്ട പരിപാടികളെക്കുറിച്ചും സാമ്പത്തിക ഇടപാടുകളെക്കുറിച്ചും ഇഡി അന്വേഷണം ശക്തമാക്കിയിട്ടുണ്ട്.
പ്രവീണിന്റെ ചൂതാട്ട പരിപാടികളിൽ നിരവധി പ്രമുഖരും രാഷ്ട്രീയക്കാരും ഉൾപ്പെട്ടിട്ടുണ്ടെന്നാണ് വിവരം. ചികോടി പ്രവീൺ ഹവാല ഇടപാടുകളുടെ ഭാഗമായിട്ടുണ്ടെന്നാണ് ഇഡിക്ക് ലഭിച്ചിരിക്കുന്ന സൂചന. ഇതിന്റെ പശ്ചാത്തലത്തിലാണ് ഇഡി നീരീക്ഷണം ശക്തമാക്കിയത്.
Comments