ജാപ്പനീസ് ഇരുചക്ര വാഹന ബ്രാന്ഡായ ഹോണ്ട മോട്ടോർസൈക്കിൾ ആന്ഡ് സ്കൂട്ടർ ഇന്ത്യ തങ്ങളുടെ പുതിയ ലിമിറ്റഡ് എഡിഷൻ ഡിയോ അവതരിപ്പിച്ചു. ഹോണ്ട വിപണിയില് എത്തിച്ചിട്ടുള്ള സ്കൂട്ടറുകളില് ആക്ടീവയ്ക്ക് ശേഷം ഏറ്റവുമധികം ജനപ്രീതി നേടിയ മോഡലാണ് ഡിയോ. ഹോണ്ട ഡിയോ സ്പോർട്സ് എന്ന് വിളിക്കപ്പെടുന്ന ഈ പുതിയ ലിമിറ്റഡ് എഡിഷൻ സ്കൂട്ടറിന്റെ സ്റ്റാൻഡേർഡ് വേരിയന്റിന് 68,317 രൂപയും ഡീലക്സ് വേരിയന്റിന് 73,317 രൂപയുമാണ് എക്സ്ഷോറൂം വില. രണ്ട് വ്യത്യസ്ത നിറങ്ങളിലാണ് വാഹനം ലഭിക്കുന്നത്. സ്ട്രോൺഷ്യം സിൽവർ മെറ്റാലിക് വിത്ത് ബ്ലാക്ക്, സ്പോർട്സ് റെഡ് വിത്ത് ബ്ലാക്ക് എന്നിവയാണ് കമ്പനി നൽകിയിരിക്കുന്ന നിറങ്ങൾ.
പുതിയ ഹോണ്ട ഡിയോ സ്പോർട്സ് ലിമിറ്റഡ് എഡിഷന്റെ പ്രധാന ആകർഷണം കാമഫ്ളേജ് ഗ്രാഫിക്സും സ്പോർട്ടി റെഡ് റിയർ സസ്പെൻഷനുമാണ്. കൂടാതെ ഡീലക്സ് വേരിയന്റിൽ സ്പോർട്ടി അലോയി വീലുകളും ലഭിക്കുന്നു. തടസ്സങ്ങളില്ലാത്ത റൈഡിംഗ് അനുഭവത്തിനായി എളുപ്പത്തിൽ ആക്സസ് ചെയ്യാവുന്ന സ്റ്റോറേജ് ഓപ്ഷൻ നൽകുന്ന ഫ്രണ്ട് പാക്കറ്റിലാണ് സ്കൂട്ടർ വരുന്നത്. പുതിയ ലിമിറ്റഡ് എഡിഷൻ ഡിയോ സ്പോർട്സിന് കരുത്തേകുന്നത് 110 സിസി, എൻഹാൻസ്ഡ് സ്മാർട്ട് പവർ (eSP) ഉള്ള PGM-FI എഞ്ചിനാണ്. ഈ എഞ്ചിന് 8,000 ആർപിഎമ്മിൽ 7.65 ബിഎച്ച്പിയും 4,750 ആർപിഎമ്മിൽ 9 എൻഎം ടോര്ക്കും ഉത്പാദിപ്പിക്കാൻ കഴിയും.
ടെലിസ്കോപ്പിക് സസ്പെൻഷൻ, ഇന്റഗ്രേറ്റഡ് ഡ്യുവൽ ഫംഗ്ഷൻ സ്വിച്ച്, എക്സ്റ്റേണൽ ഫ്യുവൽ ലിഡ്, പാസിംഗ് സ്വിച്ച്, എഞ്ചിൻ കട്ട് ഓഫ് ഉള്ള സൈഡ് സ്റ്റാൻഡേർഡ് ഇൻഡിക്കേറ്റർ എന്നിവ സ്കൂട്ടറിന് കമ്പനി നൽകുന്നു. കൂടാതെ പുതിയ ഡിയോയ്ക്ക് ഹോണ്ടയുടെ കോംബി-ബ്രേക്ക് സിസ്റ്റം(cbS)ഇക്വലൈസറും ത്രീ-സ്റ്റെപ്പ് അഡജസ്റ്റ് ചെയ്യാവുന്ന പിൻ സസ്പെൻഷനും മികച്ച ഇന്ധനക്ഷമതയ്ക്കായി ത്രീ-സ്റ്റെപ്പ് ഇക്കോ ഇൻഡിക്കറ്ററും ഉണ്ട്.
പുതിയ ഡിയോ സ്പോർട്സിന് യുവത്വത്തിന്റെ ശൈലി തുടരുന്നതിനൊപ്പം ഏറ്റവും മികച്ച കളര് ഓപ്ഷനുകളുടെ സംയോജനവുമുണ്ടെന്ന് ഹോണ്ട മോട്ടോർസൈക്കിൾ ആൻഡ് സ്കൂട്ടർ ഇന്ത്യയുടെ മാനേജിംഗ് ഡയറക്ടറും പ്രസിഡന്റും സിഇഒയുമായ അറ്റ്സുഷി ഒഗാറ്റ പറഞ്ഞു. ഈ ലിമിറ്റഡ് എഡിഷൻ തങ്ങളുടെ ഉപഭോക്താക്കളെ, പ്രത്യേകിച്ച് യുവതലമുറയെ അതിന്റെ സ്പോർട്ടി വൈബും ട്രെൻഡി ലുക്കും കൊണ്ട് കൂടുതൽ സന്തോഷിപ്പിക്കുമെന്ന് കമ്പനിക്ക് ഉറപ്പുണ്ടെന്ന് അദ്ദേഹം വ്യക്തമാക്കി.
Comments