ഇന്ത്യയ്‌ക്കും കേരളത്തിനും ശ്രീശങ്കർ അഭിമാനം; ഇനിയും വിജയം കൈവരിക്കട്ടെയെന്ന് മുഖ്യമന്ത്രി പിണറായി വിജയൻ

തിരുവനന്തപുരം: കോമൺവെൽത്ത് ഗെയിംസിൽ മെഡൽ നേടിയ മലയാളി താരം ശ്രീശങ്കറിന് അഭിനന്ദനങ്ങളുമായി മുഖ്യമന്ത്രി പിണറായി വിജയൻ. കേരളത്തിനും ഇന്ത്യയ്‌ക്കും ശ്രീശങ്കർ അഭിമാനമായെന്നും ഈ നേട്ടം നിരവധി യുവാക്കൾക്ക് പ്രചോദനമാകുമെന്നും മുഖ്യമന്ത്രി പറഞ്ഞു.

”ലോംഗ്ജമ്പിൽ വെള്ളി നേടിയ എം. ശ്രീശങ്കറിന് അഭിനന്ദനങ്ങൾ. ഈ ഇനത്തിൽ ആദ്യ മെഡൽ നേടിയതിലൂടെ അദ്ദേഹം കേരളത്തിനും ഇന്ത്യയ്‌ക്കും അഭിമാനമായി. ശ്രീശങ്കറിന്റെ നേട്ടം നിരവധി യുവാക്കൾക്ക് പ്രചോദനമാകും. തുടർന്നും വിജയമുണ്ടാകട്ടെയെന്ന് ആശംസിക്കുന്നു.” മുഖ്യമന്ത്രി ട്വിറ്ററിൽ കുറിച്ചു.

Congratulations to M Sreeshankar on winning silver in the long jump at #CWG2022. He has made Kerala and India proud by winning our first-ever medal in this event. His trailblazing leap will inspire many youngsters. Wishing him continued success. pic.twitter.com/k9CdDVrs5u

— Pinarayi Vijayan (@pinarayivijayan) August 5, 2022

ചരിത്ര നേട്ടം കുറിച്ചായിരുന്നു മലയാളി താരം ശ്രീശങ്കർ ലോംഗ് ജംപിൽ വെള്ളി മെഡൽ സ്വന്തമാക്കിയത്. ഇതോടെ കോമൺവെൽത്ത് ഗെയിംസിൽ ഇന്ത്യയുടെ മെഡൽ നേട്ടം 19 ആയി. 8.08 മീറ്റർ ചാടിയാണ് ഇന്ത്യയ്‌ക്ക് ആദ്യമായി ലഭിക്കുന്ന ഈ നേട്ടം താരം നേടിയത്. നേട്ടത്തിന് പിന്നിൽ അച്ഛനാണെന്നും അതുകൊണ്ട് ഈ മെഡൽ അച്ഛന് സമ്മാനിക്കുന്നുവെന്നും പാലക്കാട് സ്വദേശിയായ ശ്രീശങ്കർ പ്രതികരിച്ചിരുന്നു.

ശ്രീശങ്കറിന്റെ പ്രകടനത്തെ സ്വർണത്തിളക്കത്തോടെയാണ് രാജ്യം മുഴുവൻ നോക്കിക്കണ്ടത്. കേന്ദ്രമന്ത്രി അനുരാഗ് ഠാക്കൂറും ശ്രീശങ്കറിനെ അഭിനന്ദിച്ചിരുന്നു. നാല് പതിറ്റാണ്ടിന് ശേഷം ലോംഗ് ജംപിൽ ഇന്ത്യയ്‌ക്ക് മെഡൽ ലഭിച്ചുവെന്നും ഇത് ചരിത്ര നിമിഷമാണെന്നും അദ്ദേഹം പറഞ്ഞു. ലോകത്ത് ഇന്ത്യയുടെ മുന്നേറ്റത്തെ രേഖപ്പെടുത്തിയ ശ്രീശങ്കറിന് നിരവധി വിജയങ്ങൾ കൈവരിക്കാൻ ഇനിയും സാധിക്കട്ടെയെന്ന് കേന്ദ്രമന്ത്രി ട്വിറ്ററിലൂടെ അറിയിച്ചു.