പത്തനംതിട്ട: പമ്പാ റിസർവോയറിൽ ജലനിരപ്പ് ഉയരുന്നതിനാൽ ബ്ലു അലർട്ട് പ്രഖ്യാപിച്ചു. കെഎസ്ഇബി ലിമിറ്റഡിന്റെ ശബരിഗിരി ജലവൈദ്യുത പദ്ധതിയുടെ ഭാഗമായ പമ്പാ റിസർവോയറിന്റെ പരമാവധി ജലനിരപ്പ് 986.33 മീറ്ററാണ്. 982 മീറ്ററിൽ(നീല), 983.50 മീറ്റര്(ഓറഞ്ച്), 984.50 മീറ്റര് ജലനിരപ്പ് ഉയർന്നാലാണ് പമ്പ ഡാമിൽ റെഡ് അലർട്ട് പ്രഖ്യാപിക്കുന്നത്. ഇന്ന് (5-8-22) വൈകിട്ട് 3.30 നാണ് റിസര്വോയറിലെ ജലനിരപ്പ് 982 മീറ്ററില് എത്തിയത്. ഇതോടെ ജില്ലാഭരണകൂടം ജനങ്ങൾക്ക് ജാഗ്രത നിർദ്ദേശം നൽകി.
വൃഷ്ടിപ്രദേശത്ത് മഴയുള്ളതിനാല് റിസര്വോയറിലേക്കുള്ള നീരൊഴുക്ക് ശക്തമാണ്. കാലാവസ്ഥാ പ്രവചനം അനുസരിച്ച് വൃഷ്ടിപ്രദേശത്ത് ശക്തമായ മഴ തുടരും. റിസര്വോയറിലെ അധിക ജലം സ്പില്വേയിലൂടെ ഒഴുക്കി വിടുന്ന നടപടിയുടെ ഭാഗമായാണ് കെഎസ്ഇബി അണക്കെട്ട് സുരക്ഷാ വിഭാഗം ഇന്ന്(5-8-22) വൈകിട്ട് 3.30 മുതല് ആദ്യഘട്ട മുന്നറിയിപ്പായ നീല അലര്ട്ട് പ്രഖ്യാപിച്ചിട്ടുള്ളത്. ഈ സാഹചര്യത്തില് പമ്പാ നദിയുടെയും കക്കാട്ടാറിന്റെയും ഇരുകരകളില് താമസിക്കുന്നവരും പൊതുജനങ്ങളും ജാഗ്രത പുലര്ത്തണമെന്ന് ജില്ലാ കളക്ടറും ജില്ലാ ദുരന്തനിവാരണ അതോറിറ്റി ചെയര്പേഴ്സണുമായ ഡോ.ദിവ്യ എസ്.അയ്യര് അറിയിച്ചു.
റിസര്വോയറിലെ ജലനിരപ്പ് 983.50 മീറ്റര് എത്തിച്ചേരുന്ന സാഹചര്യത്തില് ഓറഞ്ച് അലര്ട്ടും ജലനിരപ്പ് 984.50 മീറ്റര് എത്തിച്ചേരുന്ന സാഹചര്യത്തില് റെഡ് അലര്ട്ടും പ്രഖ്യാപിക്കും. സംസ്ഥാന ദുരന്തനിവാരണ അതോറിറ്റി പ്രസിദ്ധീകരിച്ചിട്ടുള്ള ഓറഞ്ച് ബുക്കിലെ നിര്ദേശങ്ങള്ക്ക് അനുസൃതമായി വാര്ത്ത പത്ര, ദൃശ്യ, ശ്രവ്യ മാദ്ധ്യമങ്ങള് വഴി അറിയിപ്പ് നൽകും. ജലനിരപ്പ് ഉയർന്നാൽ മൈക്ക് അനൗണ്സ്മെന്റ് നടത്തിയ ശേഷം താഴ്ന്ന പ്രദേശങ്ങളില് നിന്നും ജനങ്ങളെ പൂര്ണമായും ഒഴിപ്പിച്ച് ദുരിതാശ്വാസ ക്യാമ്പിലേക്ക് മാറ്റുമെന്നും ജില്ലാ ഭരണകൂടം അറിയിച്ചു.
Comments