മഴക്കാലത്ത് ആളുകളെ വളരെയേറെ ബുദ്ധിമുട്ടിക്കുന്ന ഒന്നാണ് പനിയും ജലദേഷവും. ജലദോഷത്തിന്റെ കൂടെ കഫക്കെട്ട് കൂടിയാകുമ്പോൾ കൂടുതൽ അസ്വസ്ഥമാകും നമ്മുടെ ശരീരവും മനസും. കഫക്കെട്ട് അധികമാകുമ്പോൾ ചിലർക്ക് ചെവി അടയുന്ന പ്രശ്നം കണ്ടുവരാറുണ്ട്. ആ സമയത്ത് അസഹനീയമായ വേദനയാണ് അനുഭവപ്പെടുന്നത്. ഈ ബുദ്ധിമുട്ടിന് കാരണമെന്തെന്നും അത് ഇല്ലാതിരിക്കാൻ എന്തെല്ലാം ചെയ്യാമെന്നും നോക്കാം.
കണ്ടക്ടീവ് ഹിയറിംഗ് ലോസ്സ്
നമ്മളുടെ ചെവിയിൽ അഴുക്ക്(ചെപ്പി) അടിഞ്ഞ് കൂടുമ്പോഴും അതുപോലെ, നല്ല കഫക്കെട്ട് ഉണ്ടാകുമ്പോൾ, ചെവിയിൽ ഇൻഫക്ഷൻ വരുമ്പോൾ എല്ലാം നമുക്ക് കേൾവിക്കുറവ് അനുഭവപ്പെടാറുണ്ട്. ഇത്തരത്തിൽ അനുഭവപ്പെടുന്ന കേൾവിക്കുറവിനെയാണ് കണ്ടക്ടീവ് ഹിയറിംഗ് ലോസ്സ് എന്ന് വിശേഷിപ്പിക്കുന്നത്.
കഫക്കെട്ട് വരുമ്പോൾ എങ്ങിനെയാണ് കേൾവിക്കുറവ് ഉണ്ടാകുന്നത്
നമ്മളുടെ ചെവി, മൂക്ക്, തൊണ്ട എന്നിവയെല്ലാം തന്നെ പരസ്പരം ബന്ധപ്പെട്ടിരിക്കുന്നവയാണ്. ഇതിൽ ഏതെങ്കിലും ഒരു ഭാഗത്ത് എന്തെങ്കിലും ഇൻഫക്ഷൻ വന്നാൽ, നമ്മളുടെ കേൾവിക്ക് കുറച്ച് ബുദ്ധിമുട്ടുള്ളപോലെ നമുക്ക് അനുഭവപ്പെടും. അതുപോലെ, നമ്മളുടെ ചെവിയിൽ വീക്കം വരുന്നത് കൃത്യമായി കേൾക്കാതിരിക്കുവാനും കാരണമാകുന്നുണ്ട്.
എന്നാൽ ഈ കേൾവിക്കുറവ് കഫക്കെട്ട് മാറിയിട്ടും, അല്ലെങ്കിൽ രണ്ട് ദിവസത്തിനുമേലെ നീണ്ട് നിൽക്കുന്നുണ്ടെങ്കിൽ വേഗത്തിൽ ഡോക്ടറെ കാണേണ്ടത് അത്യാവശ്യമായ കാര്യമാണ്.
പരിഹാരം
നല്ല കഫക്കെട്ട് വരുമ്പോൾ ചെവിയിൽ ഇൻഫക്ഷൻ വരാറുണ്ട്. ഇത്തരത്തിൽ വരാതിരിക്കുവാൻ ഇടയ്ക്കിടയ്ക്ക് കൈകൾ കഴുകി മാത്രം ഉപയോഗിക്കുക. ഇത് അണുക്കളെ തടയും.
പലരും ചെവി ക്ലീൻ ആക്കുവാൻ ബഡ്സ് ഉപയോഗിക്കാറുണ്ട്. എന്നാൽ കോട്ടൻ ബഡ്സ് ഉപയോഗിക്കുമ്പോൾ അതിലെ കോട്ടന്റെ അംശം നമ്മളുടെ ചെവിയിൽ ഇരിക്കുകയും ഇത് കൂടുതൽ കേൾവിക്കുറവിലേയ്ക്ക് നയിക്കുകയും ചെയ്യും.
ചെവി അടയുന്നത് കുറയ്ക്കുവാൻ എന്തെങ്കിലും വായയിൽ ഇട്ട് ചവയ്ക്കുക. ഇത്തരത്തിൽ ചവയ്ക്കുമ്പോൾ ചെവി തുറന്ന് ആയി വരുന്നതാണ്. വായ അടച്ചതിനുശേഷം മൂക്കിലൂടെ പതുക്കെ ശ്വസിക്കുക ഇതും അടഞ്ഞ ചെവി തുറക്കുവാൻ നല്ലതാണ്.
ഇടയ്ക്ക് കോട്ടുവായ ഇടുന്നതും വെള്ളം കുടിച്ചുകൊണ്ടിരിക്കുന്നതുമെല്ലാം തന്നെ ചെവി അടയുന്നത് കുറയ്ക്കുവാൻ സഹായിക്കും. ഇതൊന്നും ചെയ്തിട്ടും ശരിയാകുന്നില്ലെങ്കിൽ ഒരു ഡോക്ടറെ കാണുന്നതാവും ഉചിതം.
