‘കിയ’ പൊള്ളുന്ന ‘തീ’ വില!; സോണറ്റിന്‍റെ വില വീണ്ടും കൂട്ടി- Kia Sonet

ദക്ഷിണ കൊറിയന്‍ വാഹന ബ്രാന്‍ഡായ കിയയ്‌ക്ക് ഇന്ത്യൻ വിപണയിൽ വലിയ സ്വീകാര്യതയാണുള്ളത്. കമ്പനിയുടെ വാഹനങ്ങൾ വലിയ തോതിൽ തന്നെ വിറ്റുപോകുന്നുണ്ട്. എന്നാൽ കിയ ആരാധകരെ സംബന്ധിച്ച് ദുഃഖകരമായ വാർത്തയാണ് റിപ്പോർട്ട് ചെയ്യപ്പെടുന്നത്. കിയ ഇന്ത്യ തങ്ങളുടെ സോണറ്റ് കോംപാക്റ്റ് എസ്‌യുവിയുടെ വില ഉയർത്തി. വാഹനത്തിന്‍റെ വില 34,000 രൂപ വരെയാണ് കമ്പനി വർദ്ധിപ്പിച്ചതെന്ന് കാര്‍ വാലെ റിപ്പോര്‍ട്ട് ചെയ്യുന്നു.

ഈ ജനുവരിയിൽ സോണറ്റിന്റെ വില കമ്പനി വർദ്ധിപ്പിച്ചിരുന്നു. ഈ വർഷം ഇത് രണ്ടാമതാണ് കിയ വാഹനത്തിന് വില കൂട്ടിയിരിക്കുന്നതത്. HTE, HTK, HTK+, HTX, HTX+, GTX+, ആനിവേഴ്‌സറി എഡിഷൻ വേരിയന്റുകളിൽ കിയ സോണറ്റ് ലഭ്യമാണ്. അടിസ്ഥാന HTE 1.2 പെട്രോൾ വേരിയന്റിന് 34,000 രൂപയുടെ വർദ്ധനവ് വരെ രേഖപ്പെടുത്തുമ്പോൾ മറ്റ് വേരിയന്റുകളുടെ വർദ്ധനവ് 10,000 രൂപയ്‌ക്കും 16,000 രൂപയ്‌ക്കും ഇടയിലാണ്.

കിയ ഇന്ത്യ സോണറ്റിന്റെ 2022 പതിപ്പ് പുറത്തിറക്കിയത് 2022 ഏപ്രിലിലാണ്. സൈഡ് എയർബാഗുകൾ, ടയർ പ്രഷർ മോണിറ്ററിംഗ് സിസ്റ്റം, ബ്രേക്ക് അസിസ്റ്റ്, ഹിൽ-അസിസ്റ്റ് കൺട്രോൾ, ഇലക്ട്രോണിക് സ്റ്റെബിലിറ്റി കൺട്രോൾ തുടങ്ങിയ പുതിയ കൂട്ടിച്ചേർക്കലുകളോടെ എസ്‌യുവിയുടെ ഫീച്ചർ ലിസ്റ്റ് കമ്പനി മെച്ചപ്പെടുത്തിയിരുന്നു. മാത്രമല്ല, ഇംപീരിയൽ ബ്ലൂ, സ്പാർക്ലിംഗ് സിൽവർ കളർ ഓപ്ഷനുകളിലും വാഹനം ലഭ്യമാക്കി. മൂന്ന് എഞ്ചിനുകളിലായാണ് വാഹനം പുറത്തിറങ്ങിയത്. 1.2 ലിറ്റർ നാച്ചുറലി ആസ്പിറേറ്റഡ് പെട്രോൾ, 1.0 ലിറ്റർ ടർബോ-പെട്രോൾ, 1.5 ലിറ്റർ ഡീസൽ എഞ്ചിൻ എന്നിങ്ങനെയാണ് ഓപ്ഷനുകൾ. ഗിയർബോക്‌സ് ഓപ്ഷനുകളിൽ അഞ്ച് സ്പീഡ് മാനുവൽ, ആറ് സ്പീഡ് ഐഎംടി, ആറ് സ്പീഡ് മാനുവൽ, ആറ് സ്പീഡ് ഓട്ടോമാറ്റിക് എന്നിവ ഉൾപ്പെടുന്നു.