ന്യൂഡൽഹി: ബഹിരാകാശ ഗവേഷണ രംഗത്ത് നിർണായക ചുവടുവയ്പ്പിനൊരുങ്ങി ഐഎസ്ആർഒ. ആദ്യമായി നിർമ്മിച്ച ചെറിയ റോക്കറ്റ് എസ്എസ്എൽവി (സ്മാൾ സാറ്റ്‌ലൈറ്റ് ലോഞ്ച് വെഹിക്കിൾ) ഇന്ന് വിക്ഷേപിക്കും. ശ്രീഹരിക്കോട്ടയിലെ സതീഷ് ധവാൻ സ്‌പേസ് സെന്ററിൽ നിന്നും രാവിലെ 9.18 ഓടെയാണ് വിക്ഷേപണം.
എർത്ത് ഒബ്‌സർവേഷൻ സാറ്റ്‌ലൈറ്റ് (ഇഒഎസ്-02), ആസാദി സാറ്റ് എന്നീ ഉപഗ്രഹങ്ങളെയും വഹിച്ചാകും എസ്എസ്എൽവി ബഹിരാകാശത്തേക്ക് കുതിക്കുക. ഇതിൽ ആസാദിസാറ്റിന്റെ നിർമ്മാണത്തിൽ പങ്കാളികളായിരിക്കുന്നത് രാജ്യത്തിന്റെ വിവിധ ഭാഗങ്ങളിൽ നിന്നുള്ള വിദ്യാർത്ഥിനികളാണ്. സ്‌പേസ് കിഡ്‌സ് ഇന്ത്യ എന്ന സ്റ്റാർട്ടപ്പിന് കീഴിൽ രാജ്യത്തെ 68 സ്‌കൂളുകളിൽ നിന്നുള്ള 750 വിദ്യാർത്ഥിനികൾ ചേർന്നാണ് ആസാദിസാറ്റ് നിർമ്മിച്ചിരിക്കുന്നത്.
ആസാദി കാ അമൃത് മഹോത്സവത്തിന്റെ ഭാഗമായാണ് ഐഎസ്ആർഒ എസ്എസ്എൽവി നിർമ്മിച്ചത്. 500 കിലോ ഭാരം വഹിക്കാൻ ശേഷിയുള്ളതാണ് ഐഎസ്ആർഒയുടെ ഈ കുഞ്ഞൻ റോക്കറ്റ്. 120 ടണ്ണാണ് ഇതിന്റെ ഭാരം. പിഎസ്എൽവിയേക്കാൾ നിർമ്മാണ ചെലവ് കുറഞ്ഞ ഈ റോക്കറ്റിന് ഒന്നിലധികം ഉപഗ്രഹങ്ങളെ വഹിക്കാനുള്ള ശേഷിയുണ്ട്.
