കൊൽക്കത്ത: ഇന്ത്യയിലെ ആദ്യത്തെ അണ്ടർവാട്ടർ മെട്രോ 2023 ജൂണിൽ നിർമ്മാണം പൂർത്തിയാകുമെന്ന് റിപ്പോർട്ട്. കിഴക്ക്-പടിഞ്ഞാറൻ ഇടനാഴി പദ്ധതിയുടെ നിർമ്മാണ ചുമതല വഹിക്കുന്ന കൊൽക്കത്ത മെട്രോ റെയിൽ കോർപ്പറേഷൻ (കെഎംആർസി) ആണ് ഇക്കാര്യം അറിയിച്ചത്.
ഹൂഗ്ലി നദിക്കടിയിലൂടെ കൊൽക്കത്ത വഴി ഹൗറയുമായി ബന്ധിപ്പിക്കുന്ന മെട്രോ ലൈനാണിത്. ആകെ 16.55 കിലോമീറ്റർ ദൈർഘ്യം വരുന്ന മെട്രോ ലൈൻ പദ്ധതിയുടെ 9.30 കിലോമീറ്റർ നീളം ഇതിനോടകം പ്രവർത്തനക്ഷമമായി. ശേഷിക്കുന്ന 7.25 കിലോമീറ്റർ ദൈർഘ്യം ഒരു വർഷത്തിനുള്ളിൽ പൂർത്തിയാകുമെന്ന് അധികൃതർ അറിയിച്ചു.
ഹൗറ, സീൽദാ റെയിൽവേ സ്റ്റേഷനുകളെയും കൊൽക്കത്ത മെട്രോയുടെ നോർത്ത്-സൗത്ത് ലൈനിനെയും ബന്ധിപ്പിക്കുന്നതിനാൽ പദ്ധതി പൂർത്തിയാകുന്നതോടെ ലക്ഷക്കണക്കിന് യാത്രക്കാർക്ക് വലിയ ആശ്വാസമാകുമെന്നാണ് കരുതുന്നത്. ആകെയുള്ള 16.55 കിലോമീറ്റർ നീളത്തിൽ നദിക്കടിയിലൂടെ പോകുന്ന ഭാഗം 10.8 കിലോമീറ്ററാണ്.
പദ്ധതി 2021 ഡിസംബറിൽ പൂർത്തിയാകുമെന്നായിരുന്നു നേരത്തെ പ്രഖ്യാപിച്ചിരുന്നത്. എന്നാൽ ടണൽ നിർമിക്കുന്ന ജോലികൾക്കിടെ കൊൽക്കത്തയിലെ ബൗബസാറിലുണ്ടായ അപകടങ്ങൾ മൂലം കാലതാമസം സംഭവിക്കുകയായിരുന്നു.
