ബർമിംഗ്ഹാം: കോമൺവെൽത്ത് ഗെയിംസ് സമാപിച്ചതിന് പിന്നാലെ രണ്ട് പാകിസ്താൻ ബോക്സർമാരെ ബർമിംഗ്ഹാമിൽ കാണാതായതായി റിപ്പോർട്ട്. പാകിസ്താൻ ബോക്സിംഗ് ഫെഡറേഷൻ (പിബിഎഫ്) സെക്രട്ടറി നസീർ താങ് ഇക്കാര്യം സ്ഥിരീകരിച്ചു. ബോക്‌സർമാരായ സുലൈമാൻ ബലോച്ചിനെയും നസീറുള്ളയെയുമാണ് കാണാതായത്.
കോമൺവെൽത്തിനായി ബർമിംഗ്ഹാമിലെത്തിയ കായിക താരങ്ങളുടെ സംഘം തിരികെ ഇസ്ലാമാബാദിലേക്ക് മടങ്ങാൻ മണിക്കൂറുകൾ മാത്രം ബാക്കി നിൽക്കെയാണ് ഇരുവരെയും കാണാതായതെന്ന് ബോക്സിംഗ് ഫെഡറേഷൻ അറിയിച്ചു. അവരുടെ പാസ്പോർട്ടുകൾ ഉൾപ്പെടെ യാത്രയ്‌ക്കാവശ്യമായ എല്ലാ രേഖകളും ബോക്സിംഗ് ഫെഡറേഷൻ ഉദ്യോഗസ്ഥരുടെ പക്കലാണ്.
ഇരുവരുടെയും തിരോധാനത്തെക്കുറിച്ച് യുകെയിലുള്ള പാകിസ്താൻ ഹൈക്കമ്മീഷനെയും ലണ്ടനിലെ മറ്റ് അധികൃതരെയും അറിയിച്ചിട്ടുണ്ടെന്നും പിബിഎഫ് സെക്രട്ടറി നസീർ താങ് വ്യക്തമാക്കി. അതിനിടെ കാണാതായ ബോക്സർമാരെ കുറിച്ച് അന്വേഷിക്കാൻ പാകിസ്തൻ ഒളിമ്പിക് അസോസിയേഷൻ (പിഒഎ) നാലംഗ അന്വേഷണ സമിതിക്ക് രൂപം നൽകി.
ഭാരോദ്വഹനത്തിലും ജാവലിൻ ത്രോയിലുമായി രണ്ട് സ്വർണമുൾപ്പെടെ എട്ട് മെഡലുകളായിരുന്നു കോമൺവെൽത്ത് ഗെയിംസിൽ പാകിസ്താൻ സ്വന്തമാക്കിയത്. അതേസമയം ബോക്‌സിംഗിൽ ഒറ്റ മെഡൽ പോലും നേടാൻ പാകിസ്താന് കഴിഞ്ഞിരുന്നില്ല.
