വാഹന പ്രേമികളുടെ എക്കാലത്തേയും ഇഷ്ട വാഹനമാണ് സ്കോർപിയോ. ഇപ്പോൾ മഹീന്ദ്ര തങ്ങളുടെ പുതിയ സ്കോർപിയോ ക്ലാസിക് അവതരിപ്പിച്ചിരിക്കുകയാണ്. ഈ വർഷം ആദ്യമാണ് എസ്യുവിയുടെ ബിഗ് ഡാഡി എന്ന് വിളിക്കപ്പെടുന്ന സ്കോർപിയോ N കമ്പനി പുറത്തിറക്കിയത്. പിന്നാലെ സ്കോർപിയോ ക്ലാസിക് കൂടി എത്തുന്നതോടെ എതിരാളികളുടെ നെഞ്ചിടിപ്പ് കൂടുകയാണ്. ഓഗസ്റ്റ് 20 മുതൽ ഇന്ത്യൻ വിപണിയിൽ വാഹനം വിൽപ്പനയ്ക്ക് എത്തും.
എസ്, എസ് 11 എന്നീ രണ്ട് വേരിയന്റുകളിൽ സ്കോർപിയോ ക്ലാസിക് മഹീന്ദ്ര വാഗ്ദാനം ചെയ്യും. സ്കോർപിയോയുടെ മുൻ തലമുറ പുനർനിർമ്മിക്കപ്പെടുമെന്നാണ് വാഹനപ്രേമികൾ പ്രതീക്ഷിച്ചത്. എന്നാൽ മാറ്റങ്ങൾ വരുത്തി പുറത്തിറക്കിയിരിക്കുകയാണ് സ്കോർപ്പിയോ ക്ലാസിക്. ലംബത്തിലുള്ള 6 സ്ലാറ്റുകളുള്ള ചെറുതായി പുനർരൂപകൽപ്പന ചെയ്ത ഗ്രില്ലും മഹീന്ദ്രയുടെ പുതിയ ട്വിൻസ്-പീക്ക് ലോഗോയും പുതിയ വാഹനത്തിന്റെ പ്രത്യേകതയാണ്. ബമ്പറിന് പുതിയ സ്കിഡ് പ്ലേറ്റ്, ഫോഗ് ലാമ്പ് ഹൗസിംഗ്, എൽഇഡി ഡേടൈം റണ്ണിംഗ് ലാമ്പുകൾ എന്നിവ കമ്പനി നൽകുമ്പോൾ സ്കോർപിയോയുടെ ബോണറ്റിലെ ഐക്കണിക് ബോണറ്റ് സ്കൂപ്പ് നിലനിർത്തിയിട്ടുമുണ്ട്.
വാഹനത്തിന്റെ വശങ്ങളിൽ പുതിയ ബോഡി ക്ലാഡിംഗാണ്. 17 ഇഞ്ച് വലിപ്പമുള്ള സ്മാർട്ട് ലുക്കിംഗ് ഡയമണ്ട് കട്ട് അലോയ് വീലുകൾ, എൽഇഡി ടെയിൽ ലാമ്പുകൾ കാണാം. പിറക് വശത്തെ കറുത്ത ടവർ പില്ലറുകൾക്ക് പകരം ഇപ്പോൾ ചുവപ്പ് നിറമാണ് പുതിയ ക്ലാസിക്കിൽ നൽകിയിരിക്കുന്നത്. വാഹനത്തിന്റെ ക്യാബിൻ ഭൂരിഭാഗവും പഴയ സ്കോർപിയോയുടെ പോലെ തന്നെ നിലനിർത്തുന്നു. എന്നാൽ സ്ക്രീൻ മിറ്ററിംഗിനെ പിന്തുണയ്ക്കുന്ന ആൻഡ്രോയിഡ് അടിസ്ഥാനമാക്കിയുള്ള പുതിയ 9 ഇഞ്ച് ടച്ച്സ്ക്രീൻ ഇൻഫോടെയ്ൻമെന്റ് സിസ്റ്റം സ്കോർപിയോ ക്ലാസിക്കിന് ഉണ്ട്.
എംഹാക്ക് ഡീസൽ എഞ്ചിനിന്റെ രണ്ടാം തലമുറയാണ് സ്കോർപിയോ ക്ലാസിക്കിന് ലഭിക്കുന്നത്. 55 കിലോഗ്രാമോളം ഭാരം കുറവാണ് ഈ എഞ്ചിന് . 132 പിഎസ് പരമാവധി കരുത്തും 300 എൻഎം പീക്ക് ടോർക്കും ഉത്പാദിപ്പിക്കുന്നുണ്ട് എഞ്ചിൻ. 230 എൻഎം ടോർക്ക് 1,000 ആർപിഎമ്മിൽ നിന്ന് ലഭിക്കുമെന്ന് മഹീന്ദ്ര ഉറപ്പ് നൽകുന്നു. ഇന്ധനക്ഷമത 15 ശതമാനം വർദ്ധിപ്പിച്ചെന്നും നിർമ്മാതാക്കൾ അവകാശപ്പെടുന്നുണ്ട്. മുൻ തലമുറ സ്കോർപിയോയേക്കാൾ ചെറുതും അനായാസം ചലിപ്പിക്കാൻ കഴിയുന്ന 6-സ്പീഡ് ദിയർബോക്സാണ് വാഹനത്തിന് കമ്പനി നൽകിയിട്ടുള്ളത്.
സസ്പെൻഷൻ സജ്ജീകരണത്തിൽ, ബോഡിയുടെ നിയന്ത്രണത്തിന് നാല് സ്ട്രറ്റുകളിലും എംടിവി-സില് ഡാംപറുകൾ മഹീന്ദ്ര പുതിയ സ്കോർപിയോ ക്ലാസിക്കിന് നൽകിയിട്ടുണ്ട്. സസ്പെൻഷൻ സജ്ജീകരണവും പുനഃസ്ഥാപിച്ചിട്ടുണ്ട്. സ്കോർപിയോ ക്ലാസിക്കിൽ മഹീന്ദ്ര ചില ഫീച്ചറുകളും ചേർത്തിട്ടുണ്ട്. ക്രൂയിസ് കൺട്രോൾ, കോർണറിംഗ് ലാമ്പുകൾ, ഓട്ടോമാറ്റിക് ക്ലൈമറ്റ് കൺട്രോൾ എന്നിവയാണ് അവയെന്ന് റിപ്പോർട്ടുകൾ വരുന്നു.
Comments