രാജ്യത്തിന്റെ 75-ാം സ്വാതന്ത്ര്യ വാർഷികം ആഘോഷിച്ച് നടൻ ദിലീപ്. റാഫി സംവിധാനം ചെയ്യുന്ന വോയ്സ് ഓഫ് സത്യനാഥൻ എന്ന ചിത്രത്തിന്റെ സെറ്റിലാണ് ദിലീപും അണിയറ പ്രവർത്തകരും സ്വാതന്ത്ര്യദിനം ആഘോഷിച്ചിരിക്കുന്നത്. മുംബൈയിൽ ചിത്രത്തിന്റെ ഷൂട്ടിംഗ് പുരോഗമിക്കുകയാണ്. താരം തന്നെയാണ് തന്റെ ഔദ്യോഗിക ഫേയ്സ്ബുക്ക് പേജിലൂടെ ചിത്രം പങ്കുവെച്ചിരിക്കുന്നത്. ‘സ്വാതന്ത്ര്യത്തിന്റെ 75-ാം വർഷം ആഘോഷിക്കുന്നു, മേരാ ഭാരത് മഹാൻ. “വോയ്സ് ഓഫ് സത്യനാഥൻ ടീം..” ജയ് ഹിന്ദ്’ എന്നാണ് ചിത്രം പങ്കുവെച്ചുകൊണ്ട് ദിലീപ് കുറിച്ചിരിക്കുന്നത്.
പഞ്ചാബി ഹൗസ്, പാണ്ടിപ്പട, ചൈനാടൗൺ, തെങ്കാശിപ്പട്ടണം, റിങ്ങ്മാസ്റ്റർ എന്നിങ്ങനെ ഒരുപിടി മികച്ച ചിത്രങ്ങൾക്ക് ശേഷം റാഫി-ദിലീപ് കൂട്ടുകെട്ട് വീണ്ടും ഒരുമിക്കുന്ന സിനിമയാണ് വോയ്സ് ഓഫ് സത്യനാഥൻ. റാഫി തന്നെയാണ് സിനിമയുടെ കഥ, തിരക്കഥ, സംഭാഷണം എന്നിവയും ഒരുക്കിയിരിക്കുന്നത്. വലിയ ഒരിടവേളയ്‌ക്ക് ശേഷം ബോളിവുഡ് താരം അനുപംഖേർ വീണ്ടും മലയാളത്തിലേയ്‌ക്ക് തിരിച്ചെത്തുന്നു എന്നതും ചിത്രത്തിനെ ശ്രദ്ധേയമാക്കുന്നു. സിനിമയിൽ സുപ്രധാന വേഷത്തിലെത്താലാണ് അനുപംഖേർ എത്തുന്നത്.
കഴിഞ്ഞ വർഷം ഒക്ടോബറിൽ കൊച്ചിയിൽ ആരംഭിച്ച വോയ്സ് ഓഫ് സത്യനാഥന്റെ ചിത്രീകരണം ഇടയ്‌ക്കു വെച്ച് താൽക്കാലികമായി നിർത്തിയിരുന്നു. പത്ത് മാസത്തെ ഇടവേളയ്‌ക്കു ശേഷമാണ് വീണ്ടും ചിത്രീകരണം ആരംഭിച്ചിരിക്കുന്നത്. ബാദുഷ സിനിമാസിന്റേയും ഗ്രാന്റ് പ്രൊഡക്‌ഷന്‍സിന്റേയും ബാനറിൽ എൻ.എം ബാദുഷ, ഷിനോയ് മാത്യു, ദിലീപ്, പ്രിജിൻ ജെ.പി എന്നിവർ ചേർന്നാണ് വോയ്സ് ഓഫ് സത്യനാഥൻ’ നിർമ്മിക്കുന്നത്. ദിലീപിനെ കൂടാതെ ജോജു ജോർജ്, സിദ്ധിഖ്, ജോണി ആന്റണി, വീണ നന്ദകുമാർ തുടങ്ങിയവരും പ്രധാന വേഷത്തിൽ എത്തുന്നു.
