ന്യൂഡൽഹി : എൻഡിടിവിയുടെ സോഷ്യൽ മീഡിയ പേജിൽ മണിക്കൂറുകൾക്കകം മൂന്ന് പ്രൊഫൈൽ ചിത്രങ്ങൾ മാറ്റിയ സംഭവം ചർച്ചയാകുന്നു. ആസാദി കാ അമൃത് മഹോത്സവിന്റെ ഭാഗമായി ത്രിവർണ പതാകയുടെ ചിത്രമാണ് രാവിലെ പത്ത് മണിയോടെ എൻഡിടിവി പ്രൊഫൈൽ ഫോട്ടോയാക്കിയത്. എന്നാൽ വൈകീട്ട് നാല് മണിയോടെ പ്രൊഫൈൽ ചിത്രം വീണ്ടും പഴയത് പോലെയാക്കുകയായിരുന്നു. വൈകീട്ട് ഏഴ് മണിക്ക് വീണ്ടും അത് അമൃത് മഹോത്സവം സൂചിപ്പിക്കുന്ന ഇന്ത്യ @75 എന്ന ഡിസൈനിലേക്ക് മാറ്റുകയായിരുന്നു
ത്രിവർണ നിറത്തിൽ എൻഡിടിവി എന്ന് രേഖപ്പെടുത്തിയ ചിത്രമാണ് രാവിലെ 10 മണിയോടെ സോഷ്യൽ മീഡിയ പേജുകളിൽ സ്ഥാപനം ഡിപിയാക്കിയത്. എന്നാൽ ഇതിൽ പച്ചനിറം കൂടുതലാണെന്നും അശോകചക്രം എവിടെയെന്നും ചോദിച്ചുളള കമന്റുകൾ താഴെ നിറഞ്ഞു. ഇതിന് പിന്നാലെ ത്രിവർണ ഡിപിയാക്കിയതിന് മതമൗലിക വാദികളുടെയും പ്രതിപക്ഷ പാർട്ടികളുടെ സൈബർ പോരാളികളുടെയും വിമർശനവും സ്ഥാപനം ഏറ്റുവാങ്ങി. തുടർന്നാണ് വൈകിട്ട് നാല് മണിയോടെ സ്ഥാപനത്തിന്റെ പഴയ ഡിപി തന്നെ വീണ്ടും ഇട്ടത്. ഇതോടെ ദേശസ്നേഹികൾ കടുത്ത ആക്രമണവുമായി രംഗത്തെത്തി.
എൻഡിടിവിയിലെ ഒരു വിഭാഗം ജീവനക്കാരുടെ പ്രതിഷേധത്തെ തുടർന്നാണ് ഈ മാറ്റമെന്നും കമന്റുകളിൽ നിറഞ്ഞു. എവിടെയാണ് നിങ്ങളുടെ തിരംഗ എന്ന് ചോദിച്ച് ഇതിന് താഴെയും കമന്റുകളെത്തി. ഷെയിം ഓൺ എൻഡിടിവി പരാമർശവും കമന്റുകളിൽ പ്രത്യക്ഷപ്പെട്ടു. ഇതിന് പിന്നാലെയാണ് മണിക്കൂറുകൾക്കകം സ്വാതന്ത്ര്യത്തിന്റെ അമൃത മഹോത്സവിനെ സൂചിപ്പിക്കുന്ന ഡിസൈൻ ഡിപിയാക്കി മാറ്റിയത്. സ്വാതന്ത്ര്യദിന തലേന്ന് മണിക്കൂറുകൾക്കകം ഇങ്ങനെ ഡിപി മാറ്റേണ്ടി വന്നതിനെ പരിഹസിച്ചും പലരം ഇതോടെ രംഗത്തെത്തി.
