വീണ്ടുമൊരു ഇലക്ട്രിക് സ്കൂട്ടർ ഇന്ത്യൻ വിപണിയിൽ അവതരിപ്പിച്ച് ഒല. പുതിയ എസ് 1 ഇലക്ട്രിക് സ്കൂട്ടറാണ് ഒല പരിചയപ്പെടുത്തിയരിക്കുന്നത്.. 99,000 രൂപയാണ് സ്കൂട്ടറിന്റെ പ്രാരംഭ വില. വാഹനത്തിനായുള്ള ബുക്കിംഗ് ഇതിനോടകം തന്നെ ആരംഭിച്ചു. ഓഗസ്റ്റ് 15 മുതൽ 31 വരെയാണ് ബുക്കിംഗ് സമയം. വെറും 499 രൂപ ബുക്കിംഗിന് എസ് 1 ഇലക്ട്രിക് സ്കൂട്ടർ ലഭ്യമാണ്. സ്കൂട്ടറിന്റെ ഡെലിവറി സെപ്റ്റംബർ 7 മുതൽ ആരംഭിക്കും.
ഒല എസ് 1 ഇലക്ട്രിക് സ്കൂട്ടർ അഞ്ച് നിറങ്ങളിലാണ് വരുന്നത്. ജെറ്റ് ബ്ലാക്ക്, കോറൽ ഗ്ലാം, ലിക്വിഡ് സിൽവർ, പോർസലൈൻ വൈറ്റ്, നിയോ മിന്റ് എന്നിവയാണ് കളർ ഓപ്ഷനുകൾ. ഇക്കോ, നോർമൽ, സ്പോർട്ട് എന്നിങ്ങനെ മൂന്ന് വ്യത്യസ്ത റൈഡിംഗ് മോഡലുകൾ ഒല എസ്1 വാഗ്ദാനം ചെയ്യുന്നു. നോർമൽ, സ്പോർട്ട് മോഡലുകൾ യഥാക്രമം 101 കിലോമീറ്ററും 90 കിലോ മീറ്ററും ഓടാൻ സഹായിക്കുന്നു. ഒറ്റ ചാർജിൽ 131 കിലോമീറ്റർ റേഞ്ച് പുതിയ ഇലക്ട്രിക് സ്കൂട്ടർ ഓടുമെന്ന് കമ്പനി അവകാശപ്പെടുന്നു. ഇതിനായി 3kWh ഇലക്ട്രിക് മോട്ടോറാണ് എസ് 1 ന് നൽകിയിരിക്കുന്നത്.
വിലകൂടിയ എസ്1 പ്രോയിൽ മാത്രം നൽകുന്ന ഹൈപ്പർ മോഡ് ഒല S1-ന് ലഭിക്കുന്നില്ല. ബാറ്ററി സെല്ലുകൾ ഇവി നിർമ്മാതാവ് തദ്ദേശീയമായി തന്നെ നിർമ്മിച്ചതാണ്. കഴിഞ്ഞ വർഷം പുറത്തിറക്കുകയും ഏഴ് മാസത്തിനുള്ളിൽ 70,000 യൂണിറ്റുകൾ വിറ്റഴിക്കുകയും ചെയ്ത ഒല എസ് 1 പ്രോ ഇലക്ട്രിക് സ്കൂട്ടറിന്റെ അതേ തരത്തിലാണ് ഒല എസ്1 ഇലക്ട്രിക് സ്കൂട്ടർ കമ്പനി നിർമ്മിച്ചിരിക്കുന്നത്. ലോകത്തിലെ ഏറ്റവും വലിയ ഇരുചക്രവാഹന ഫാക്ടറിയെന്ന് കമ്പനി അവകാശപ്പെടുന്ന ഒല ഫ്യൂച്ചർ ഫാക്ടറിയിലാണ് പുതിയ ഒല സ്കൂട്ടറും നിർമ്മിക്കുന്നത്.
കഴിഞ്ഞ ഏതാനും മാസങ്ങളായി ഒലയുടെ എസ്1 പ്രോ മോഡലുമായി ബന്ധപ്പെട്ട് നിരവധി പരാതികൾ ഉയർന്നിരുന്നു. റിവേഴ്സ് മോഡിൽ അനിയന്ത്രിമായി ഓടുക, അമിതമായി ചൂടാകുക, ബാറ്ററി പൊട്ടിത്തെറിക്കുക തുടങ്ങി വിവിധങ്ങളായ പ്രശ്നങ്ങളാണ് ഉപഭോക്താക്കൾ നേരിട്ടിരുന്നത്.
