ലണ്ടൻ: ഇന്ത്യൻ വനിതാ ക്രിക്കറ്റിന്റെ പേസ് കരുത്ത് ജൂലാൻ ഗോസ്വാമി അന്താരാഷ്ട്ര ക്രിക്കറ്റിൽ നിന്ന് വിരമിക്കുന്നു. ഇംഗ്ലണ്ടിനെതിരെ നടക്കാനിരിക്കുന്ന പരമ്പരയോടെ വിരമിക്കുമെന്നാണ് ജൂലാൻ അറിയിച്ചിരിക്കുന്നത്. തന്റെ 39-ാം വയസ്സിലാണ് ജൂലാൻ ഇന്ത്യൻ ടീമിൽ നിന്നും വിരമിക്കുന്നത്.
പശ്ചിമ ബംഗാളിലെ നാദിയ ജില്ലക്കാരിയായ ജൂലാൻ ബാബൂൽ എന്ന വിളിപ്പേരിലാണ് ടീമിൽ അറിയപ്പെടുന്നത്. 12 ടെസ്റ്റ് മത്സരങ്ങളിലും 201 ഏകദിനത്തിലും 68 ടി20യിലും ജൂലാൻ ഇന്ത്യയെ പ്രതിനിധീകരിച്ചു കഴിഞ്ഞു. ടെസ്റ്റിൽ 25 ന് 5 എന്ന മികച്ച ബൗളിംഗ് പ്രകടന ത്തോടെ 44 വിക്കറ്റുകളാണ് ഇതുവരെ വീഴ്ത്തിയത്. ഏകദിനങ്ങളിൽ 31 ന് 6 എന്ന നേട്ടത്തോടെ 252 വിക്കറ്റുകളാണ് ജൂലാൻ വീഴ്ത്തിയത്. ടി20യിൽ 11ന് 5 എന്ന മികച്ച പ്രകടനത്തോടെ 56 വിക്കറ്റുകളും ജൂലാൻ ഇതുവരെ വീഴ്ത്തിയിട്ടുണ്ട്.
അന്താരാഷ്ട്ര വനിതാ ക്രിക്കറ്റിൽ ഏറ്റവും അധികം കാലം ടെസ്റ്റ് മത്സരങ്ങളിൽ പങ്കാളിയായ രണ്ടാമത്തെ താരമാണ് ജൂലാൻ. ടെസ്റ്റിൽ പത്തുവിക്കറ്റുകൾ വീഴ്ത്തുന്ന ഏറ്റവും പ്രായം കുറഞ്ഞ താരവും ജൂലാനാണ്. ഏകദിന വനിതാ ക്രിക്കറ്റിൽ ഏറ്റവുമധികം പന്തെറിഞ്ഞ താരമെന്ന റെക്കോഡും ജൂലാന്റെ പേരിലാണ്.
