ജഗതി ശ്രീകുമാറിന് ഓണക്കോടി സമ്മാനിച്ച് മുൻ എംപിയും നടനുമായ സുരേഷ് ഗോപി. തിരുവനന്തപുരത്തെ വസതിയിലെത്തിയാണ് ഹാസ്യ സാമ്രാട്ടിന് മലയാളത്തിന്റെ ആക്ഷൻ കിംഗ് ഓണക്കോടി സമ്മാനിച്ചിരിക്കുന്നത്. നീണ്ട ഇടവേളയ്‌ക്ക് ശേഷം സുരേഷ് ഗോപിയെ കണ്ടതോടെ താരം പുഞ്ചിരിച്ചു കൊണ്ടാണ് അദ്ദേഹത്തെ സ്വീകരിച്ചത്. ഓണക്കോടി നൽകിയതിന് പുറമെ രമേഷ് പുതിയമഠം എഴുതിയ ‘ജഗതി എന്ന അഭിനയ വിസ്മയം’ എന്ന പുസ്തകത്തിന്റെ പ്രകാശനവും സുരേഷ് ഗോപി നിർവഹിച്ചു.
പുസ്തകത്തിൽ പ്രതിപാദിക്കുന്ന പല കാര്യങ്ങളും അടുത്തിരുന്ന് സുരേഷ് ഗോപി ജഗതിയ്‌ക്ക് വിവരിച്ചു നൽകി. ഏറെ നേരം ജഗതിയ്‌ക്കും അദ്ദേഹത്തിന്റെ വീട്ടുകാർക്കുമൊപ്പം സമയം ചിലവഴിച്ച ശേഷമാണ് സുരേഷ് ഗോപി മടങ്ങിയത്. അപകടത്തെ തുടർന്ന് സിനിമാ തിരക്കുകളിൽ നിന്നെല്ലാം വിട്ടുനിൽക്കുന്ന ജഗതി ശ്രീകുമാറിനെ വീണ്ടും പഴയ ഊർജ്ജത്തിൽ കാണാണമെന്നാണ് മലയാളികളുടെ ആഗ്രഹം. മോഹൻലാലും മമ്മൂട്ടിയുമടക്കമുള്ള താരങ്ങൾ അദ്ദേഹത്തെ പലപ്പോഴായി വീട്ടില്ലെത്തി സന്ദർശിക്കാറുണ്ട്. സംസാരിക്കാൻ കഴിയില്ലെങ്കിലും നടൻ എല്ലാം കേൾക്കുകയും മനസ്സിലാക്കുകയും ചെയ്യും. സിബിഐ അ‍‍ഞ്ചാം ഭാഗത്തിൽ പഴയ ചാക്കോ എന്ന കഥാപാത്രവുമായി അദ്ദേഹം മലയാള സിനിമയിലേയ്‌ക്ക് ഒരു തിരിച്ചു വരവും നടത്തിയിരുന്നു.
അതേസമയം, സുരേഷ് ഗോപി അഭിനയിച്ച പാപ്പൻ അമ്പത് കോടിയും കടന്ന് വിജയകരമായി പ്രദർശനം തുടരുകയാണ്. താരത്തിന്റെ വലിയ ഒരു തിരിച്ചുവരവിനാണ് മലയാള സിനിമാലോകം സാക്ഷ്യം വഹിച്ചത്. വരനെ ആവശ്യമുണ്ട്, കാവൽ എന്നീ വിജയ ചിത്രങ്ങൾക്ക് ശേഷം സുരേഷ് ഗോപി അഭിനയിച്ച ചിത്രമാണ് പാപ്പൻ. ജോഷി-സുരേഷ്ഗോപി കൂട്ടിക്കെട്ടിൽ ഒരുങ്ങിയ ചിത്രം സുരേഷ് ഗോപിയുടെ ഏറ്റവും വലിയ കളക്ഷൻ സ്വന്തമാക്കുന്ന ചിത്രമായിരിക്കുകയാണ്. ജിബു ജേക്കബ് സംവിധാനം ചെയ്ത ‘മേം ഹൂ മൂസ’യാണ് റിലീസ് ചെയ്യുന്ന താരത്തിന്റെ അടുത്ത ചിത്രം. ആരാധകർ ഏറെ കാത്തിരിക്കുന്ന മാസ്സ് ചിത്രമായ ഒറ്റക്കൊമ്പൻ, ജയരാജിന്റെ സംവിധാനത്തിൽ ഒരുങ്ങുന്ന ഹൈവേ ടു, രാഹുൽ രാമചന്ദ്രൻ സംവിധാനം ചെയ്യുന്ന പേരിട്ടിട്ടില്ലാത്ത ഒരു ഗ്യാങ്സ്റ്റർ ചിത്രം എന്നിങ്ങനെ ഒരുപിടി ചിത്രവുമായി മലയാള സിനിമാ രംഗത്ത് വീണ്ടും മിന്നിത്തിളങ്ങാൻ ഒരുങ്ങുകയാണ് സുരേഷ് ഗോപി.
