തിരുവനന്തപുരം: സി പി എം ഓഫീസ് ആക്രമിച്ചെന്ന പേരിൽ പൊലീസ് അറസ്റ്റ് ചെയ്ത മുഴുവൻ എബിവിപി പ്രവർത്തകർക്കും ജാമ്യം. ഹരിശങ്കർ, സതീർത്ഥ്യൻ, ലാൽ, സന്ദീപ്, സെഫിൻ എന്നീ പ്രവർത്തകർക്കാണ് ജാമ്യം ലഭിച്ചത്. സ്റ്റേഷൻ ജാമ്യത്തിലാണ് ഇവരെ വിട്ടയച്ചത്.
സിപിഎം ജില്ലാ ഓഫീസ് ആക്രമിച്ചതുമായി ബന്ധപ്പെട്ട് പോലീസിന്റെ മുഖം രക്ഷിക്കാൻ പ്രവർത്തകരെ വേട്ടയാടുന്ന നടപടി അങ്ങേയറ്റം പ്രതിഷേധാർഹമാണെന്ന് എബിവിപി സംസ്ഥാന സെക്രട്ടറി എൻസിടി ശ്രീഹരി പറഞ്ഞു. ഭരിക്കുന്ന പാർട്ടിയുടെ തലസ്ഥാനത്തെ ഓഫീസ് അക്രമിച്ച കേസാണ്. എന്നിട്ടും പ്രതികളെ റിമാൻഡ് പോലും ചെയ്യാതെ സ്റ്റേഷൻ ജാമ്യത്തിൽ വിട്ടയക്കമെങ്കിൽ കേസ് കെട്ടിച്ചമച്ചതല്ലാതെ മറ്റെന്താണെന്ന് എൻസിടി ശ്രീഹരി ചോദിച്ചു.
എകെജി സെന്ററിൽ നിന്ന് ലഭിച്ച പേരുകൾ പ്രതിപ്പട്ടികയിൽ ചേർത്താൽ നിയമത്തിന് മുന്നിൽ പോലീസിന് മറുപടി പറയേണ്ടി വരിക തന്നെ ചെയ്യുമെന്നും ശ്രീഹരി പറഞ്ഞു. വഞ്ചിയൂർ വനിതാ കൗൺസിലറെ കയ്യേറ്റം ചെയ്‌തെന്ന കേസിൽ എബിവിപി പ്രവർത്തകരെ മജിസ്‌ട്രേറ്റ് പ്രഥമദൃഷ്ട്യാ തെളിവില്ലെന്ന് കണ്ട് വിട്ടയക്കുകയായിരുന്നു. ഇതിന്റെ ജാള്യത മറക്കാൻ എകെജി സെന്ററിൽ നിന്ന് തയ്യാറാക്കി നൽകിയ ലിസ്റ്റ് പ്രകാരം എബിവിപി പ്രവർത്തകരെ പോലീസ് പ്രതിപട്ടികയിൽ ചേർക്കുകയായിരുന്നു. ആശുപത്രിയിൽ ചികിത്സയിൽ കഴിയുന്ന പ്രവർത്തകനെയടക്കം പ്രതിപ്പട്ടികയിൽ ചേർത്ത പോലീസ് സി പി എമ്മിന് അടിമപ്പണി ചെയ്യുകയായിരുന്നുവെന്നും ശ്രീഹരി പറഞ്ഞു.
Comments