ആലപ്പുഴ : വീട്ടിലെ മുറിയിൽ ഉറങ്ങിക്കിടന്ന യുവതിയുടെ പാദസരം മോഷ്ടിച്ച പ്രതി അറസ്റ്റിൽ . കൊല്ലം കരുനാഗപ്പള്ളി സ്വദേശി ബിസ്മില്ല മൻസിലിൽ അൻഷാദാണ് അറസ്റ്റിലായത്. ഓഗസ്റ്റ് 22ന് പുലർച്ചെയാണ് കേസിനാസ്പദമായ സംഭവം നടക്കുന്നത്.
കായംകുളം സ്വദേശിയായ ലേഖ മുരളീധരന്റെ വീട്ടിലാണ് മോഷണം നടന്നത്. ഇവരുടെ മകൾ മയൂരിയുടെ പാദസരമാണ് പ്രതി ജനലിലൂടെ കൈയ്യിട്ട് മോഷ്ടിച്ചത്. ഒരു പവൻ തൂക്കം വരുന്ന സ്വർണ്ണ പാദസരമായിരുന്നു ഇത്. കാലിൽ കിടന്ന പാദസരം പ്രതി വലിച്ചു പൊട്ടിക്കുകയായിരുന്നു.
പിന്നാലെ വീട്ടുകാർ പോലീസിൽ പരാതി നൽകി. പരാതിയുടെ അടിസ്ഥാനത്തിൽ കേസെടുത്ത് പോലീസ് അന്വേഷണം ആരംഭിക്കുകയായിരുന്നു. സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിലാണ് പ്രതി അൻഷാദാണെന്ന് പോലീസ് കണ്ടത്തിയത്.
പിന്നാലെ ഇയാളെ അറസ്റ്റ് ചെയ്യുകയായിരുന്നു.രണ്ടാം കുറ്റി ഭാഗത്ത് ഇറച്ചി കടയിൽ ജോലി ചെയ്യുന്ന ആളാണ് അൻഷാദെന്ന് പോലീസ് പറഞ്ഞു.ഇയാൾക്കെതിരെ കരുനാഗപ്പള്ളി, ഓച്ചിറ, ചവറ പോലീസ് സ്റ്റേഷനുകളിൽ പിടിച്ചു പറി കേസുകൾ നിലവിലുണ്ട്.
