ദുബായ് : ഇന്ന് നടക്കാനിരിക്കുന്ന പോരാട്ടത്തിന് മുന്നേ ഇന്ത്യൻ താരമാണ് തങ്ങളുടെ ഹീറോ എന്ന് പറഞ്ഞു ഹോങ്കോംഗ് താരങ്ങൾ. ഇന്ന് നടക്കാനിരിക്കുന്ന ഇന്ത്യ-ഹോങ്കോംഗ് ഏഷ്യാകപ്പ് പോരാട്ടത്തിന് മുന്നോടിയായ ഒരുക്കങ്ങൾ വിശദീകരിക്കുമ്പോഴാണ് വിരാട് കോഹ്ലിക്കെതിരെ കളിക്കാനിറങ്ങുന്നതിന്റെ ആവേശം ഹോങ്കോംഗ് താരങ്ങൾ പങ്കുവെച്ചത്. വിരട് കോഹ്ലി എക്കാലത്തേയും തന്റെ പ്രീയപ്പെട്ട താരമാണ്. ഇന്ത്യൻ ടീമിന്റെ പോരാട്ട വീര്യം ശക്തമാക്കിയത് വിരാടാണ്. കോഹ്ലിയുടെ കളിമികവ് എന്നും ഏറെ ശ്രദ്ധയോടെയാണ് നിരീക്ഷിക്കുന്നതെന്നും നിസാകാത് ഖാൻ പറഞ്ഞു.
2018ൽ ഏകദിന പോരാട്ടത്തിലെ പിഴവുകൾ ഇത്തവണ ആവർത്തിക്കില്ലെന്നും നിസാകാത് ഖാൻ പറഞ്ഞു. ഇന്ത്യയ്ക്കെതിരെ 2008ലും 2018ലുമാണ് ഹോങ്കോംഗ് ടീം ഏകദിന മത്സരങ്ങൾ കളിച്ചത്. ഇതിൽ 2018ലെ മത്സരത്തിൽ 20 റൺസിനാണ് പരാജയപ്പെട്ടത്. ഇത് ഇത്തവണ ആവർത്തിക്കില്ലെന്നും ശക്തമായ പോരാട്ടം കാഴ്ചവയ്ക്കുമെന്നും നിസാകാത് ഖാൻ പറഞ്ഞു.
ഏഷ്യാ കപ്പിന്റെ ഏകദിന ഫോർമാറ്റ് മാറ്റിയതിനാൽ മത്സരങ്ങളോടും ടീമുകളോടുമുള്ള സമീപനത്തിൽ കാര്യമായ മാറ്റം ആവശ്യമായി വന്നിരിക്കുന്നു. താരങ്ങളെ പരീക്ഷിക്കാൻ അധികം സമയം ലഭിക്കില്ല. എതിരാളിയുടെ പാളിച്ച ഉടൻ മുതലെടുക്കാനാകുന്നവർ വിജയിക്കുമെന്നതാണ് ടി20യുടെ മാറ്റമെന്നും ഹോങ്കോംഗ് നായകൻ പറഞ്ഞു.
