ഭൂമിയുടെ 70 ശതമാനത്തിലധികം വെള്ളമാണെന്ന് അറിയാത്തവരല്ല നാം. സമുദ്രത്താൽ ചുറ്റപ്പെട്ടതാണ് നമ്മുടെ വൻകരകൾ. അത് കൊണ്ട് തന്നെ സമുദ്രനിരപ്പ് അനിയന്ത്രിതമായി ഉയരുന്നത് ഭൂമിയിലെ ജീവജാലങ്ങളെ ദോഷകരമായി തന്നെ ബാധിക്കും. നമ്മുടെ കൊച്ചിയടക്കമുള്ള കടലിനോട് ചേർന്ന് കിടക്കുന്ന വമ്പൻ നഗരങ്ങളെയാണ് ആദ്യം ഇത് ബാധിക്കുക. കാലാവസ്ഥ വ്യതിയാനം കാരണം അന്റാർട്ടിക്കയിലെയും ഗ്രീൻലാന്റിലേയും മഞ്ഞുരുകുന്നത് സമുദ്രനിരപ്പ് ക്രമാതീതമായി ഉയർത്തും.
ആഗോള സമുദ്രനിരപ്പ് 10 മുതൽ 30 ഇഞ്ച് വരെ ഉയരാൻ കാരണമാവുന്ന തരത്തിൽ ഗ്രീൻലാന്റിലെ മഞ്ഞു പാളികൾ വലിയ തോതിൽ ഉരുകുന്നതായാണ് ഒരു പുതിയ പഠനം വ്യക്തമാക്കുന്നത്. സോംബി മഞ്ഞ് എന്ന് എന്നറിയപ്പെടുന്ന പ്രതിഭാസമാണ് ജിയോളജിക്കൽ സർവേ ഓഫ് ഡെന്മാർക്ക് ആന്റ് ഗ്രീൻലാന്റിലെ ശാസ്ത്രജ്ഞർ കടലോരങ്ങൾക്ക് ഭീഷണിയാവുമെന്ന് കണ്ടെത്തിയിരിക്കുന്നത്.
സോംബി മഞ്ഞ് സമുദ്രനിരപ്പ് ഏറ്റവും കുറഞ്ഞത് 10 ഇഞ്ച് എങ്കിലും ഉയർത്തും എന്നാണ് പഠനം സൂചിപ്പിക്കുന്നത്. നികത്തപ്പെടാതെ മാതൃ ഹിമാനികളിൽ നിന്നും ഉരുകി ഒലിക്കുന്ന ഐസ് ആണ് സോംബി ഐസ് എന്നറിയപ്പെടുന്നത്. നാശം സംഭവിച്ച മഞ്ഞായാണ് സോംബി ഐസിനെ കണക്കാക്കുന്നത്. അതായത് ചത്ത മഞ്ഞായാണ് സോംബി ഐസിനെ ഗവേഷകർ വിശേഷിപ്പിക്കുന്നത്.
സോംബി ഐസ് ഉരുകുന്നതിലൂടെ വലിയ അളവിൽ ജലം കടലിടുക്കുകളിലേക്ക് എത്തിച്ചേരുകയാണെന്നും ഇത് ആഗോള സമുദ്രനിരപ്പ് 10 മുതൽ 30 ഇഞ്ച് (78 സെന്റീമീറ്റർ) വരെ ഉയർത്തുമെന്നാണ് പഠന റിപ്പോർട്ടിൽ ഉള്ളത്.
പർവ്വതങ്ങളിൽ വീഴുന്ന മഞ്ഞ് രണ്ട് തരത്തിലാണ് രൂപമാറ്റം സംഭവിക്കുന്നത് . ആദ്യത്തേത് മഞ്ഞ് അവയുടെ മാതൃ ഹിമാനികളിൽ തന്നെ നികത്തപ്പെടുകയും മറ്റൊന്ന് മാതൃ ഹിമാനികളിൽ നിന്ന് ഉരുകിയൊലിച്ച് കടലിടുക്കുകളിലേക്ക് എത്തുകയും ചെയ്യും. സന്തുലിതാവസ്ഥയിലാണ് ഇത് സംഭവിക്കുന്നതെങ്കിൽ അപകടമില്ല. എന്നാൽ കാലാവസ്ഥ വ്യതിയാനം കാരണം ഇപ്പോൾ വലിയ അളവിലാണ് മാതൃ ഹിമാനികളിൽ നിന്നും ഐസ് ഉരുകി ഇറങ്ങുന്നത്.
ഇങ്ങനെസമുദ്രനിരപ്പ് ഇത്തരത്തിൽ ക്രമാതീതമായി ഉയരുന്നത് വലിയ പ്രത്യാഘാതങ്ങൾക്ക് കാരണമാകും. വേലിയേറ്റങ്ങളും കടൽ കരയിലേക്ക് കയറുന്നതും കര കടലെടുക്കുന്നതും പതിവാകും. ഒരേ സമയം സാമൂഹികവും സാമ്പത്തികവും പാരിസ്ഥിതികവുമായ പ്രത്യാഘാതങ്ങൾക്കാണ് ഇത് വഴിയൊരുക്കുക.
