നടൻ സുരേഷ് ഗോപിയുടെ മകൾ ലക്ഷ്മിയുമായി തനിക്കുള്ള ആത്മബന്ധം തുറന്നുപറഞ്ഞ് ഇന്ദ്രൻസ്. സുരേഷ് ഗോപിയുടെ മകൾ മരിച്ചപ്പോൾ താൻ തൈപ്പിച്ച ഷർട്ടാണ് പുതപ്പിച്ചതെന്ന് ഇന്ദ്രൻ സ് പറഞ്ഞു. ഇന്നും അതോർക്കുമ്പോൾ ഒരുപാട് വിഷമമുണ്ടെന്നും അദ്ദേഹം പറഞ്ഞു.
സുരേഷ് ഗോപിക്കും രാധികയ്‌ക്കും ഉണ്ടായ ആദ്യത്തെ കുഞ്ഞാണ് ലക്ഷ്മി. ഒന്നര വയസ്സുള്ളപ്പോഴാണ് കുഞ്ഞ് അപകടത്തിൽ പെട്ട് മരിച്ചത്. സുരേഷ് ഗോപി അഭിനയിച്ച ഉത്സവമേളം എന്ന സിനിമയിൽ പ്രവർത്തിക്കുന്ന സമയത്തായിരുന്നു സംഭവമെന്ന് ഇന്ദ്രൻസ് ഓർത്തു.
അന്ന് താൻ തയ്ച്ചു കൊടുത്ത മഞ്ഞ കളറുള്ള ഷർട്ട് സുരേഷ് ഗോപിക്ക് വല്ലാതെ ഇഷ്ടമായി. ആ ഷർട്ട് തനിക്ക് തരണമെന്നും മകൾക്ക് അത് വല്ലാതെ ഇഷ്ടപ്പെട്ടു എന്നും അദ്ദേഹം പറഞ്ഞിരുന്നു. മകൾക്ക് അപകടമുണ്ടായ സമയത്ത് സുരേഷ് ഗോപി ധരിച്ചിരുന്നത് അതേ ഷർട്ടാണ്. അന്ന് ആ കുഞ്ഞിന് അന്തിയുറങ്ങാൻ അവസാനമായി അവളുടെ പെട്ടി മൂടുന്നതിന് മുൻപ് വിയർപ്പിൽ കുതിർന്ന ആ മഞ്ഞ ഷർട്ട് ഊരി അവളെ പുതപ്പിക്കുകയായിരുന്നു. ഇന്നും അതോർക്കുമ്പോൾ തനിക്ക് വിഷമമുണ്ടെന്നും ഇന്ദ്രൻസ് പറഞ്ഞു. ഇക്കാര്യം നേരത്തെ സുരേഷ് ഗോപിയും വെളിപ്പെടുത്തിയിട്ടുണ്ട്.
1992 ജൂൺ ആറിന് ഒരു വിവാഹ ചടങ്ങിൽ പങ്കെടുത്ത് തിരിച്ചുപോകുമ്പോഴാണ് വാഹനം അപകടത്തിൽപ്പെട്ട് ലക്ഷ്മിയുടെ ജീവൻ നഷ്ടമായത്. മകളുടെ മരണം വലിയ ആഘാതമാണ് സുരേഷ് ഗോപിയ്‌ക്കും രാധികയ്‌ക്കും ഉണ്ടാക്കിയത്. ഇരുവർക്കും ഇപ്പോൾ നാല് മക്കളുണ്ട്.
