ന്യൂഡൽഹി: ഇന്ത്യൻ ഫാസ്റ്റ് ബൗളർ അർഷ്ദീപ് സിങ്ങിന്റെ വിക്കിപീഡിയ പ്രൊഫൈലിലെ വിവാദ തിരുത്തലിന് പിന്നിൽ പാകിസ്താൻ ബന്ധമുണ്ടെന്ന് വിവരം. പാക് പ്രസിഡന്റായിരുന്ന പർവേസ് മുഷറഫിന്റെയും പാക് സൈന്യത്തിന്റെയും വിക്കിപീഡിയ പ്രൊഫൈലിൽ തിരുത്തൽ നടത്തിയ അതേ ഐപി അഡ്രസിൽ നിന്നാണ് അർഷ്ദീപ് സിങ്ങിന്റെ പ്രൊഫൈലും തിരുത്തപ്പെട്ടത്.
2014ൽ, പാകിസ്താൻ സൈന്യത്തെക്കുറിച്ചുള്ള നിർണായക പരാമർശങ്ങളുള്ള യുഎഇ വിക്കിപീഡിയ പേജ് എഡിറ്റ് ചെയ്യാൻ ഇതേ ഐപി വിലാസം ഉപയോഗിച്ചിരുന്നു. അർഷ്ദീപിന്റെ വിക്കിപീഡിയ പേജിൽഖാലിസ്ഥാനി ബന്ധം ചേർക്കാനും ഇതേ ഐപി വിലാസം തന്നെയാണ് ഉപയോഗിച്ചിരിക്കുന്നതെന്നാണ് കണ്ടെത്തൽ.
പാകിസ്താന്റ ഇന്റർ സർവീസസ് പബ്ലിക് റിലേഷൻസ് (ഐഎസ്പിആർ) ആണ് ഗൂഢാലോചനയ്ക്ക് പിന്നിലെന്നാണ് വിവരം. പാകിസ്താൻ സായുധ സേനയുടെ മീഡിയ ആൻഡ് പബ്ലിക് റിലേഷൻസ് വിഭാഗമാണ് ഐഎസ്പിആർ. അർഷ്ദീപ്സിങ്ങിനെ കരിവാരിതേച്ച് ഇന്ത്യൻ ക്രിക്കറ്റ് ആരാധകരെ തമ്മിലടിപ്പിക്കാനുള്ള ശ്രമമാണ് വിക്കിപീഡിയ തിരുത്തലിലൂടെ നടന്നത്.
ഏഷ്യാകപ്പിലെ സൂപ്പർഫോറിൽ ഇന്ത്യ-പാക് മത്സരത്തിന് പിന്നാലെയാണ് അർഷദീപ് സിങ്ങിനെതിരെ സെബർ ആക്രമണം ആരംഭിച്ചത്. ഖാലിസ്ഥാൻ ബന്ധമുണ്ടെന്ന് ആരോപിച്ചാണ് രോഷപ്രകടനം.
തുടർന്ന് ഇന്ത്യയിലെ വിക്കിപീഡിയ എക്സിക്യൂട്ടീവുകളെ വിളിച്ചുവരുത്തി ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയം വിശദീകരണം തേടിയിരുന്നു. പാകിസ്താനെതിരെ നടന്ന മത്സരത്തിൽ താരം നിർണായക ക്യാച്ച് കൈവിട്ടിരുന്നു. ഇന്ത്യയെ മത്സരത്തിൽ അഞ്ച് വിക്കറ്റിന് പാകിസ്താൻ പരാജയപ്പെടുത്തുകയും ചെയ്തു.
