ദുബായ് : ഇന്ത്യയെ 170ൽ പിടിച്ചുകെട്ടുമെന്ന പദ്ധതിയിൽ വിജയിച്ച് ലങ്ക. നിശ്ചിത 20 ഓവറുകളിൽ 8 വിക്കറ്റിന് 173 റൺസാണ് ഇന്ത്യയ്ക്ക് നേടാനായത്. 41 പന്തിൽ 4 സിക്സറു കളും 5 ഫോറുമടക്കം 71 റൺസ് നേടി രോഹിത് നടത്തിയ മികച്ച ബാറ്റിംഗാണ് ഇന്ത്യയ്ക്ക് തുണയായത്.
മുൻനിരയുടെ തകർച്ചയ്ക്ക് ശേഷം രോഹിത് ശർമ്മയ്ക്കൊപ്പം സൂര്യകുമാറിന്റെ 34 റൺസാണ് നിർണ്ണായകമായ 97 റൺസിന്റെ കൂട്ടുകെട്ട് ഉണ്ടാക്കിയത്. കെ.എൽ രുഹുൽ(6) റൺസിനും വിരാട് കോഹ്ലി റൺസൊന്നുമെടുക്കാതെ പുറത്തായതും ഇന്ത്യയ്ക്ക് തുടക്കത്തിൽ ഞെട്ടലായി. എന്നാൽ രോഹിത് ശർമ്മ മികച്ച ഫോമിലേയ്ക്ക് വന്നതോടെയാണ് സ്കോർ ചലിച്ചത്.
സൂര്യകുമാർ യാദവ് പതിവ് ഫോമിലേയ്ക്ക് എത്തിയില്ലെങ്കിലും 29 പന്തിൽ 34 റൺസുമായി ക്യാപ്റ്റന് പിന്തുണ നൽകി. മദ്ധ്യനിരയിൽ ഇന്ത്യയെ വരിഞ്ഞുമുറുക്കുന്നതിൽ ശ്രീലങ്ക വിജയിച്ചു. ഹാർദ്ദികും(17) ഋഷഭ് പന്തും(17) വീണതോടെ ഇന്ത്യൻ മധ്യനിരയും ചെറിയ സ്കോറുകളിൽ ഒതുങ്ങി. അവസാന നിമിഷം ആഞ്ഞടിച്ച അശ്വിൻ 7 പന്തിൽ 15 റൺസ് നേടി സ്കോർ 173ലേയ്ക്ക് എത്തിച്ചു. ദീപക് ഹൂഡ(3),ഭുവനേശ്വർ കുമാർ(0) എന്നിവരും പെട്ടന്ന് പുറത്തായി. ശ്രീലങ്കൻ ബൗളർമാരിൽ ദിൽഷൻ മധുഷനാക മൂന്ന് വിക്കറ്റുകൾ വീഴ്ത്തിയപ്പോൾ ചാമിക കരുണരത്നയും ദാസുൻ ഷനാകയും 2 വിക്കറ്റുകൾ വീതം വീഴ്ത്തി.
Comments