എറണാകുളം: മലയാളികളുടെ പ്രിയ നടൻ മമ്മൂട്ടിയ്ക്ക് ജന്മദിനാശംസകൾ നേർന്ന് മോഹൻലാൽ. ഈ ജന്മനാളിൽ തന്റെ പ്രിയപ്പെട്ട ഇച്ചാക്കയ്ക്ക് ആശംസകൾ നേരുന്നതായി മോഹൻലാൽ ഫേസ്ബുക്കിൽ പങ്കുവെച്ച വീഡിയോയിൽ പറഞ്ഞു. തന്റെ സ്വന്തം ജ്യേഷ്ഠനാണ് മമ്മൂട്ടിയെന്നും അദ്ദേഹം വ്യക്തമാക്കി.
മനുഷ്യർ തമ്മിൽ ജന്മബന്ധവും കർമ്മ ബന്ധവും ഉണ്ടെന്നാണ് നമ്മുടെ ഫിലോസഫി. രക്തബന്ധത്തെക്കാൾ വലുതാണ് ചിലപ്പോൾ കർമ്മ ബന്ധം. അത്യാവശ്യ സമയത്തെ കരുതൽ കൊണ്ടും, അറിവുകൊണ്ടുമൊക്കെ ഒരാൾക്ക് മറ്റൊരാളുമായി ദൃഢമായ കർമ്മ ബന്ധം സ്ഥാപിക്കാൻ സാധിക്കും. കൂടെ പിറന്നില്ലാ എന്നേയുള്ളൂ. എന്നാലും ഇച്ചാക്ക എനിക്ക് വല്യേട്ടനാകുന്നതും ജ്യേഷ്ഠനാകുന്നതുമെല്ലാം അങ്ങനെയാണ്. ജ്യേഷ്ഠനെപ്പോലെയല്ല ജ്യേഷ്ഠൻ തന്നെയാണ് അദ്ദേഹം.
ഒരേ കാലത്ത് സിനിമയിൽ എത്തിയെങ്കിലും പ്രായം കൊണ്ടും സ്നേഹം കൊണ്ടും ജ്യേഷ്ഠൻ, വ്യക്തി ജീവിതത്തിലും, അഭിനയ ജീവിതത്തിലും പ്രചോദനമായ ഒരാൾ. ശരീരം കൊണ്ടും അഭിനയം കൊണ്ടും, ശബ്ദംകൊണ്ടുമൊക്കെ ഇച്ചാക്കയുടെ യുവത്വം നിത്യഹരിതമായി, നാലഞ്ച് തലമുറകളുടെ വല്യേട്ടനായി നിലനിൽക്കുക എന്നത് നിസ്സാര കാര്യമല്ല. ഈ ജന്മനാളിൽ എന്റെ പ്രിയപ്പെട്ട ഇച്ചാക്കയ്ക്ക് എല്ലാവിധ ആയുരാരോഗ്യ സൗഖ്യങ്ങളും ആശംസിക്കുന്നു. ഒപ്പം ഭാവിയിലും മികച്ച കഥാപാത്രങ്ങൾക്ക് ജീവൻ നൽകാനുള്ള സൗഭാഗ്യം അദ്ദേഹത്തിന് ഉണ്ടാകട്ടെ എന്ന് ജഗദീശ്വരനോട് പ്രാർത്ഥിക്കുകയും ചെയ്യുന്നു. ഹാപ്പി ബേർത്ത് ഡേ ഇച്ചാക്കാ…. ലോട്ട്സ് ഓഫ് ലവ് ആന്റ് പ്രയേഴ്സ്.- മോഹൻലാൽ പറഞ്ഞു.
