ഡൽഹി: രാഷ്ട്രപതി ദ്രൗപതി മുർമ്മുവിനെ സന്ദർശിച്ച് നടിയും സംവിധായികയുമായ കങ്കണ റണാവത്. രാഷ്ട്രപതി ഭവനിലെത്തിയ നടി രാഷ്‌ട്രപതിയ്‌ക്ക് പൂച്ചെണ്ട് നൽകി ആദരിച്ചു. രാഷ്ട്രപതി ദ്രൗപതി മുർമ്മുവിനെ കാണാൻ സാധിച്ചതിൽ അതിയായ സന്തോഷമുണ്ടെന്നും അതിലേറെ ബഹുമാനമുണ്ടെന്നും കങ്കണ റണാവത് ഫേയ്സ്ബുക്കിൽ കുറിച്ചു. മുർമ്മുവിന്റെ സൗമ്യമായ ശബ്ദവും ശാന്തമായ പെരുമാറ്റവും ദയയോടു കൂടിയ നോട്ടവും ഹൃദയം കീഴടക്കുന്നതാണെന്നും നടി പറഞ്ഞു.
രാഷ്‌ട്രപതിയുടെ കസേരയിൽ ഇരിക്കുമ്പോൾ ഒരു ദേവതയായാണ് ദ്രൗപതി മുർമ്മുവിനെ കാണാൻ സാധിക്കുന്നത്. നമ്മെ പരിപോഷിപ്പിക്കുകയും സുഖപ്പെടുത്തുകയും വഴികാട്ടുകയും ചെയ്യുന്ന ശക്തിയായി അവർ മാറുന്നു. എന്റെ പ്രവർത്തനത്തെ നേരിട്ട് രാഷ്ട്രപതി അഭിനന്ദിച്ചതിൽ വളരെയധികം സന്തോഷമുണ്ട്. ഒരു രാഷ്‌ട്രത്തിന്റെ പൗരന് ലഭിക്കുന്ന ഏറ്റവും വലിയ സ്ഥാനത്തേയ്‌ക്ക് ദ്രൗപതി മുർമ്മുവിന് എത്താൻ സാധിച്ചുവെങ്കിൽ രാജ്യത്തെ ഏതൊരു സ്ത്രീയ്‌ക്കും അവർ പ്രതീക്ഷിക്കുന്ന ഉന്നതമായ സ്ഥാനം കീഴടക്കാൻ സാധിക്കും. രാഷ്‌ട്രപതിയുടെ സാന്നിധ്യം തന്നിൽ ആത്മവിശ്വാസം ഇരട്ടിയാക്കിയെന്നും കങ്കണ ഫേയ്സ്ബുക്കിൽ കുറിച്ചു.
അതേസമയം, മണികർണികയ്‌ക്ക് ശേഷം വീണ്ടും സംവിധായികയുടെ കുപ്പായമണിഞ്ഞിരിക്കുകയാണ് കങ്കണ റണാവത്. ഇന്ദിരാഗാന്ധിയുടെ ജീവചരിത്രത്തെ ആസ്പദമാക്കി ഒരുക്കുന്ന എമർജൻസി എന്ന സിനിമയുടെ ചിത്രീകരണ തിരക്കിലാണ് താരം. ചിത്രത്തിൽ മുൻ പ്രധാനമന്ത്രി ഇന്ദിരാ ഗാന്ധിയുടെ വേഷമാണ് നടി കങ്കണ അവതരിപ്പിക്കുന്നത്. അടിയന്തിരാവസ്ഥ, ഓപ്പറേഷൻ ബ്ലൂ സ്റ്റാർ തുടങ്ങിയ ഇന്ത്യൻ ചരിത്രത്തിലെ നിർണ്ണായക സംഭവങ്ങളടക്കം സിനിമയിലുണ്ടാകും. റിതേഷ് ഷായാണ് തിരക്കഥ. പിങ്ക്, കഹാനി തുടങ്ങിയ ചിത്രങ്ങളുടെ തിരക്കഥയിലൂടെ ശ്രദ്ധ നേടിയ തിരക്കഥാകൃത്താണ് റിതേഷ് ഷാ.
