ലക്‌നൗ: കാശി വിശ്വനാഥ ക്ഷേത്രത്തിലെ സുരക്ഷാ സ്ഥിതിഗതികൾ വിലയിരുത്തി സിഐഎസ്എഫ്. കേന്ദ്ര ആഭ്യന്തര മന്ത്രാലയത്തിന്റെ നിർദ്ദേശ പ്രകാരമാണ് സിഐഎസ്എഫ് ക്ഷേത്രത്തിന്റ സുരക്ഷാ സ്ഥിതിഗതികൾ വിലയിരുത്തുന്നത്. ഇതിന് ശേഷം സേന സംസ്ഥാന സർക്കാരിന് റിപ്പോർട്ട് സമർപ്പിക്കും.
സിഐഎസ്എഫിന്റെ കൾസൾട്ടൻസി വിഭാഗമാണ് ക്ഷേത്രത്തിന്റെ സുരക്ഷ സംബന്ധിച്ച കാര്യങ്ങൾ വിലയിരുത്തുന്നത്. കാശി വിശ്വനാഥ ക്ഷേത്ര ഇടനാഴിയും പരിസരങ്ങളിലുമാണ് സേനാംഗങ്ങൾ നിരീക്ഷണം നടത്തുന്നത്. ഇതിന് സുരക്ഷാ ക്രമീകരണങ്ങൾ, ആധുനിക ഉപകരണങ്ങൾ, വിന്യസിക്കേണ്ട സുരക്ഷാ ഉദ്യോഗസ്ഥരുടെ എണ്ണം എന്നിവ സംബന്ധിച്ച വിശദമായ റിപ്പോർട്ട് സർക്കാരിന് കൈമാറും. ഇതിന്റെ അടിസ്ഥാനത്തിൽ സർക്കാർ തുടർ നടപടികൾ സ്വീകരിക്കും.
നിലവിൽ സിആർപിഎഫും പോലീസും ചേർന്നാണ് കാശി വിശ്വനാഥ ക്ഷേത്രത്തിൽ സുരക്ഷ ഒരുക്കുന്നത്. ഇതിൽ ക്ഷേത്രത്തിന്റെ മുൻ വശത്ത് മാത്രമാണ് സിആർപിഎഫ് സേനാംഗങ്ങളെ വിന്യസിച്ചിട്ടുള്ളത്. എന്നാൽ ദിനം പ്രതി പതിനായിരക്കണക്കിന് ഭക്തർ എത്തുന്ന ക്ഷേത്രത്തിന് കൂടുതൽ സുരക്ഷ വേണമെന്ന് സംസ്ഥാന സർക്കാർ കേന്ദ്രത്തോട് ആവശ്യപ്പെടുകയായിരുന്നു.
