ശരീരത്തിൽ സ്വയം കെട്ടിട്ട് ചത്ത പാമ്പിന്റെ ചിത്രം സമൂഹമാദ്ധ്യമങ്ങളിൽ വൈറലാകുന്നു. ശരീരത്തിന്റെ മധ്യഭാഗത്ത് കെട്ടുപിണഞ്ഞ നിലയിലാണ് പാമ്പിനെ കണ്ടെത്തിയത്. പാമ്പിന്റെ ശരീരം പകുതി മലർന്ന നിലയിലാണ്. എന്തായാലും ഈ ചിത്രം കണ്ട് സോഷ്യൽ മീഡിയ അന്തംവിട്ടിരിക്കുകയാണ്.
ചിത്രം വൈറലായതോടെ പാമ്പ് സ്വന്തം ശരീരം കെട്ടിയതാണോ അതോ അതിനെ കൊന്ന ശേഷം ആരെങ്കിലും കെട്ടിയിട്ടതാണോ എന്ന സംശയങ്ങളും ഉയരുന്നുണ്ട്. എന്നാൽ ഈ സംശയത്തിന് കഴമ്പില്ലെന്നും പാമ്പുകളിലെ ചില ഇനങ്ങൾക്ക് ഇത്തരത്തിൽ സ്വയം കെട്ടിയിടാൻ സാധിക്കുമെന്നുമാണ് വിദഗ്ധർ പറയുന്നത്.
ശത്രുക്കൾ അടുത്തെത്തുമ്പോൾ പ്രതിരോധിക്കുന്നതിന്റെ ഭാഗമായാണ് പാമ്പുകൾ ഇത്തരം പ്രതിഭാസങ്ങൾ കാണിക്കുന്നത് എന്ന് പഠനം തെളിയിക്കുന്നു. ശരീരം ചുറ്റിപ്പിണഞ്ഞ ശേഷം തല ഭാഗം ഈ കെട്ടിനുള്ളിലാക്കി മറഞ്ഞിരിക്കുകയാണ് ഇവ ചെയ്യുന്നത്. രോഗാവസ്ഥ കാരണവും പാമ്പുകൾ ഇത്തരത്തിൽ പെരുമാറും. ഇൻക്ലൂഷൻ ബോഡി ഡിസീസ് അഥവാ ഐബിഡി എന്ന രോഗാവസ്ഥയാണ് ഇതിന് കാരണം.
പടം പൊഴിക്കാനുള്ള ശ്രമത്തിനിടെ ശരീരം സ്വയം കെട്ടുപിണഞ്ഞതാണ് എന്ന വാദങ്ങളും ഉയരുന്നുണ്ട്. ഇത്തരം അവസരങ്ങളിൽ പാമ്പുകൾ പരമാവധി ശരീരം കെട്ടി പിണയ്ക്കാൻ ശ്രമിക്കാറുണ്ട്. എന്തായാലും സ്വയം കെട്ടിയിട്ട പാമ്പിന്റെ ചിത്രം സോഷ്യൽ മീഡിയയിൽ ചർച്ചയായിട്ടുണ്ട്.
Comments