മലപ്പുറം/ പത്തനംതിട്ട : പത്തനംതിട്ട നഗരത്തിൽ തെരുവ് നായ ആക്രമണം. പത്തനംതിട്ട ജില്ലാ കോടതിയിലെ ഒരു മജിസ്ട്രേറ്റിനും കടിയേറ്റു. ജ്വല്ലറി സുരക്ഷാ ജീവനക്കാരനെയും നായ കടിച്ചു. മജിസ്ട്രേറ്റിനെ വെട്ടിപ്രത്ത് വെച്ചാണ് തെരുവ് നായ ആക്രമിച്ചത്.
മലപ്പുറത്ത് വൃദ്ധക്ക് നേരെയും തെരുവ് നായകളുടെ മാരകമായ അക്രമം നടന്നു. വീടിന്റെ തിണ്ണയിൽ സന്ധ്യ സമയം വിശ്രമിക്കുകയായിരുന്ന 90 വയസ്സുള്ള വൃദ്ധയെ തെരുവ് നായ്ക്കൂട്ടം മാരകമായി ആക്രമിച്ചു. മലപ്പുറം ചുങ്കത്തറ പള്ളിക്കുത്ത് സ്വദേശി തലാപ്പിൽ ചിരുതമ്മക്കാണ് കയ്യിലും കാലുകളിലുമായി പരിക്കേറ്റത്. ഇവരെ നിലമ്പൂർ ജില്ലാ ഹോസ്പിറ്റലിൽ എത്തിച്ച് ചികിത്സയ്ക്ക് വിധേയമാക്കി.
സർക്കാർ യുപി സ്കൂളും മറ്റ് സ്ഥാപനങ്ങളുമുള്ള പള്ളിക്കുത്ത് പ്രദേശത്ത് വ്യാപകമായ രീതിയിൽ തെരുവ് നായ ശല്ല്യം ഉണ്ടായിട്ടും അധികാരികൾ വേണ്ട നടപടികൾ എടുക്കാത്തതിൽ പ്രതിഷേധത്തിലാണ് പ്രദേശ വാസികൾ.
