ചെന്നൈ: ന്യൂസിലൻഡ് എ ടീമിനെതിരായ ഏകദിന പരമ്പരയിൽ ഇന്ത്യൻ ടീമിനെ മലയാളിതാരം സഞ്ജു സാംസൺ നയിക്കും. ന്യൂസിലൻഡ് എ-യ്‌ക്കെതിരായ മൂന്ന് മത്സരങ്ങളുടെ ഇന്ത്യ എ ടീമിനെ ഇന്ന് ഓൾ-ഇന്ത്യ സീനിയർ സെലക്ഷൻ കമ്മിറ്റി തിരഞ്ഞെടുത്തു. വിക്കറ്റ് കീപ്പർ ബാറ്ററായ സഞ്ജുവിനെ ക്യാപ്റ്റനായി പ്രഖ്യാപിച്ചതോടെ നിലവിലുയരുന്ന വിമർശനങ്ങൾക്ക് താത്കാലിക ആശ്വാസമാകും. കളികളിൽ നിന്ന് സഞ്ജു സാംസണിനെ മാറ്റി നിർത്തുന്നതിന് ബിസിസിഐ ഏറെ വിമർശനങ്ങൾ നേരിട്ടിരുന്നു.
സെപ്റ്റംബർ 22 നാണ് ന്യൂസിലൻഡ്- ഇന്ത്യ ഏകദിന പരമ്പര ആരംഭിക്കുന്നത്. പൃഥ്വി ഷാ, അഭിമന്യു ഈശ്വരൻ, റുതുരാജ് ഗെയ്‌ക്‌വാദ്, രാഹുൽ ത്രിപാഠി, രജത് പാട്ടീദാർ, സഞ്ജു സാംസൺ (ക്യാപ്റ്റൻ), കെഎസ് ഭരത് (വിക്കറ്റ് കീപ്പർ), കുൽദീപ് യാദവ് , ഷഹബാസ് അഹമ്മദ്, രാഹുൽ ചാഹർ , തിലക് വർമ്മ, കുൽദീപ് സെൻ, ഉംമ്രാൻ മാലിക്, നവദീപ് സൈനി, രാജ് അംഗദ് ബാവ എന്നിവരാണ് ഇന്ത്യ എ ടീമിൽ കളിക്കുന്നവർ.
ആദ്യ മത്സരം സെപ്റ്റംബർ 22ന് നടക്കുമ്പോൾ 25, 27 തീയതികളിൽ ബാക്കി രണ്ട് മത്സരങ്ങൾ നടക്കും. തമിഴ്നാട്ടിലെ എംഎ ചിദംബരം സ്റ്റേഡിയത്തിലാണ് മത്സരങ്ങൾ നടക്കുക.
