ഭുവനേശ്വർ : പ്രധാനമന്ത്രി നരേന്ദ്ര മോദിയുടെ 72 ാം പിറന്നാൾ ദിനത്തിൽ, അദ്ദേഹത്തിന് ആശംസ നേർന്ന് പ്രശസ്ത കലാകാരൻ സുദർശൻ പട്നായിക്. പുരി ബീച്ചിൽ പ്രധാനമന്ത്രിയുടെ മണൽ ശിൽപം ഒരുക്കിക്കൊണ്ടാണ് സുദർശൻ പട്നായിക് ആശംസകൾ നേർന്നത്.
വ്യത്യസ്തമായ രീതിയിൽ മണ്ണുകൊണ്ടുള്ള ചായക്കപ്പുകൾ ഉപയോഗിച്ചാണ് മോദിയുടെ ശിൽപം നിർമ്മിച്ചിരിക്കുന്നത്. 1,213 ചായ കപ്പുകൾ കൊണ്ട് അഞ്ചടി ഉയരത്തിൽ ശിൽപമുണ്ടാക്കി. അഞ്ച് ടൺ മണലാണ് ഇതിനായി ഉപയോഗിച്ചത്. ”ഹാപ്പി ബർത്ത്ഡേ മോദിജി” എന്നും ഇതിൽ എഴുതിയിട്ടുണ്ട്.
ഒരു ചായക്കടക്കാരനിൽ നിന്ന് പ്രധാനമന്ത്രി പദവിയിലേക്ക് അദ്ദേഹത്തിന്റെ യാത്ര ലോകത്തോട് പറയാൻ വേണ്ടിയാണ് ചായക്കപ്പ് കൊണ്ട് തന്നെ ശിൽപം സൃഷ്ടിച്ചത് എന്ന് പട്നായിക് പറഞ്ഞു. ഈ ശിൽപത്തിലൂടെ പ്രധാനമന്ത്രിക്ക് താൻ പിറന്നാൾ ആശംസകൾ അറിയിക്കുന്നതായും അദ്ദേഹം വ്യക്തമാക്കി.
എല്ലാ വർഷവും പ്രധാനമന്ത്രിയുടെ പിറന്നാളിന് അദ്ദേഹം മണൽ ശിൽപങ്ങൾ നിർമ്മിക്കാറുണ്ട്. 60 ഇന്റർനാഷണൽ സാന്റ് ആർട്ട് ചാമ്പ്യൻഷിപ്പുകളിൽ പങ്കെടുത്ത പദ്മ ശ്രീ സുദർശൻ പട്നായിക്, രാജ്യത്തിന് വേണ്ടി നിരവധി സമ്മാനങ്ങളും നേടിയിട്ടുണ്ട്.
