ഡൽഹി: കോൺഗ്രസ് ഇല്ലാതെ മുന്നണി ആസൂത്രണം ചെയ്യുന്നവർ വിഡ്ഢികളുടെ പറുദീസയിലാണ് ജീവിക്കുന്നതെന്ന് കോൺഗ്രസ് നേതാവ് ജയറാം രമേശ്. കോൺഗ്രസിനെ കൂടാതെ പ്രതിപക്ഷ ഐക്യം ഉണ്ടാകില്ല. പല പ്രാദേശിക പാർട്ടികളും തങ്ങളുടെ സ്വാർത്ഥതാൽപ്പര്യങ്ങൾക്കായി കോൺഗ്രസിനെ പിന്നിൽ നിന്ന് കുത്തിയെന്നും ഒരു പഞ്ചിംഗ് ബാഗായി പാർട്ടിയെ ഉപയോഗിച്ചെന്നും ജയറാം രമേശ് മാദ്ധ്യമങ്ങളോട് പ്രതികരിച്ചു.
കോൺഗ്രസിന്റെ പങ്കില്ലാതെ പ്രതിപക്ഷ ഐക്യം ഉണ്ടാകില്ല. അത് അടിസ്ഥാനപരമാണ്. കോൺഗ്രസിനെ ഒഴിവാക്കി കൊണ്ട് ഏതെങ്കിലും ഒരു ബിജെപി ഇതര സംഘടന അഞ്ച് വർഷത്തേക്ക് സുസ്ഥിരമായ ഒരു സർക്കാർ രൂപീകരിക്കാം എന്നു വിചാരിക്കുന്നുണ്ടെങ്കിൽ അവർ വിഡ്ഢികളുടെ പറുദീസയിലാണെന്ന് ജയറാം രമേശ് പറയുന്നു.
അരവിന്ദ് കെജ്രിവാളിന്റെ ആം ആദ്മി പാർട്ടിയും (എഎപി) മമതാ ബാനർജിയുടെ തൃണമൂൽ കോൺഗ്രസും മുൻകാലങ്ങളിൽ കോൺഗ്രസിന് പ്രധാന ഇടം നൽകുന്നതിനെ എതിർക്കുകയും വിമർശിക്കുകയും ചെയ്ത പാർട്ടികളാണ്. ആം ആദ്മി പാർട്ടി ബിജെപിയുടെ ബി ടീമാണ്. തൃണമൂൽ കോൺഗ്രസിനെ സംബന്ധിച്ച് അവരുടെ പേരിലെങ്കിലും കോൺഗ്രസ് ഉണ്ടെന്നും ജയറാം രമേശ് പറഞ്ഞു. കോൺഗ്രസില്ലാതെ പ്രതിപക്ഷ ഐക്യത്തെക്കുറിച്ച് പറയുന്നവർ മഹത്തായ പാർട്ടിയെ ദുർബലപ്പെടുത്തുന്നവരാണ്. കോൺഗ്രസിനെ ഒഴിവാക്കി പ്രതിപക്ഷ ഐക്യം ഒരിക്കലും ഉണ്ടാകില്ല എന്ന് അവർ ഓർത്താൽ നല്ലതാണെന്നും കോൺഗ്രസ് നേതാവ് വാദിക്കുന്നു.
Comments