മൊഹാലി: ഹാർദിക് പാണ്ഡ്യ വീണ്ടും ആഞ്ഞടിച്ച മത്സരത്തിൽ ഓസ്ത്രേല്യയ്ക്കെതിരെ ഇന്ത്യക്ക് മികച്ച സ്കോർ. നിശ്ചിത ഓവറിൽ ഇന്ത്യ ആറ് വിക്കറ്റിന് 208 റൺസെടുത്തു. ഓസീസിനെതിരെയുളള ടി20 പരമ്പരയിലെ ആദ്യ മത്സരത്തിൽ ഇന്ത്യ മികച്ച ബാറ്റിങ് പ്രകടനമാണ് പുറത്തെടുത്തത്. ഹാർദിക് പാണ്ഡ്യ, കെ എൽ രാഹുൽ, സൂര്യകുമാർ യാദവ് എന്നിവരുടെ ഉജ്ജ്വല പ്രകടനമാണ് ഇന്ത്യയെ മികച്ച സ്കോറിലേക്ക് നയിച്ചത്. ടോസ് നേടിയ കംഗാരുക്കൾ ആതിഥേയരെ ബാറ്റിങിന് അയച്ചു.
നായകൻ രോഹിത്ശർമ്മ(11), മുൻ നായകൻ വിരാട് കോഹ്ലി(2) എന്നിവർ തുടക്കത്തിൽ തന്നെ പുറത്തായെങ്കിലും യുവ താരങ്ങൾ അവസരത്തിന് ഒത്ത് ഉയർന്നു. ഹാർദിക് പാണ്ഡ്യയുടെ വേഗതയാർന്ന ബാറ്റിങ് പ്രകടനമാണ് ഇന്ത്യയെ 200 കടത്തിയത്. 30 പന്തുകളിൽ നിന്ന് 71 റൺസ് എടുത്ത പാണ്ഡ്യ അഞ്ച് സിക്സറുകളും ഏഴ് ഫോറും അടിച്ചു.
വൈസ് ക്യാപ്റ്റൻ കെ എൽ രാഹുൽ(55) റൺസ് നേടി. സൂര്യകുമാർ യാദവ് 25 പന്തുകളിൽ 46 റൺസെടുത്തു ടീമിന് മികച്ച അടിത്തറ നൽകി. അവസാന ഓവറുകളിൽ ആഞ്ഞടിച്ച പാണ്ഡ്യ 20ാം ഓവറിലെ അവസാന മൂന്ന് പന്തുകൾ സിക്സർ പറത്തിയാണ് ഇന്ത്യയുടെ സ്കോർ 200 കടത്തിയത്.
