എറണാകുളം : മുഖ്യമന്ത്രി പിണറായി വിജയന് കത്തെഴുതി മികച്ച നടിക്കുള്ള സംസ്ഥാന അവാർഡ് ജേതാവ് അന്ന ബെൻ. വൈപ്പിൻ ബസുകളുടെ നഗരപ്രവേശനം അനുവദിക്കണം എന്ന് ആവശ്യപ്പെട്ടാണ് താരം മുഖ്യമന്ത്രിക്ക് കത്തെഴുതിയത്. നിലവിൽ ബസുകൾക്ക് ഹൈക്കോടതി കവലയിലെത്തി മടങ്ങേണ്ടി വരുന്ന അവസ്ഥയാണ് ഉള്ളത്. 18 വർഷമായി ഉള്ള ഈ ദുരവസ്ഥയാണ് കത്തിലൂടെ അന്ന മുഖ്യമന്ത്രിയുടെ ശ്രദ്ധയിൽപ്പെടുത്തിയിരിക്കുന്നത്.
ജില്ലയുടെ എല്ലാ ഭാഗങ്ങളിൽ നിന്നും നഗരത്തിലേക്ക് ബസുകൾ വരുന്നുണ്ട്. എന്നാൽ വൈപ്പിൻ ബസുകൾക്ക് മാത്രമാണ് ഇതിന് അനുമതി നൽകാത്തത്. സെന്റ് തെരേസാസിൽ വിദ്യാർത്ഥിയായിരുന്ന കാലം മുഴുവൻ ഈ ബുദ്ധിമുട്ട് മറ്റുള്ളവരെ പോലെ താനും അനുഭവിച്ചിരുന്നെന്നും കത്തിൽ താരം വ്യക്തമാക്കുന്നു.
വൈപ്പിനിൽ നിന്നുള്ള ധാരാളം സ്ത്രീകൾ നഗരത്തിലെ ടെക്സ്റ്റൈൽ ഷോപ്പുകളിലും മറ്റു വ്യാപാര സ്ഥാപനങ്ങളിലും ജോലിചെയ്യുന്നുണ്ട്. സാധാരണക്കാരായ ഇവർക്ക് യാത്ര കൊണ്ട് മാത്രം ഉണ്ടാകുന്ന അധിക ചെലവ് താങ്ങാനാവാത്തതാണ്. ബസുകളുടെ നഗര പ്രവേശനം നടപ്പാക്കാത്തതിൽ പ്രദേശവാസികൾ സമരത്തിലാണ്. കൂടാതെ ബസുകളുടെ നഗര പ്രവേശനവുമായി ബന്ധപ്പെട്ട നാറ്റ്പാകിന്റെ റിപ്പോർട്ട് അനുകൂലമാണെന്ന് അറിയുന്നതായും കത്തിൽ പറയുന്നുണ്ട്.
