പലഹാരക്കൊ തിയൻമാരാണല്ലോ നമ്മളിൽ ഭൂരിഭാഗം പേരും? കുട്ടിക്കാലത്ത് സഹോദരന്മാരുമായി പലഹാരത്തിന് വഴക്കുണ്ടാക്കിയതും അടുക്കളയിൽ നിന്നും അമ്മ കാണാതെ പലഹാരം മോഷ്ടിച്ചതും ഇന്നലെ കഴിഞ്ഞ പോലെയില്ലേ? മുതിർന്നാലും പലഹാരത്തിന് പലഹാരം തന്നെ വേണം. ബേക്കറിയിലെ ചില്ലുകൂടിലിരിക്കുന്ന പലഹാരങ്ങൾ കണ്ടാൽ ഇന്നും വായിൽ കപ്പലോടും അല്ലേ?. വീട് വിട്ട് വിദേശത്തേക്കോ ദൂരസ്ഥലത്തേക്കോ പോകുന്ന മക്കൾക്കായി അമ്മമാർ പലഹാരങ്ങൾ പൊതിഞ്ഞു നൽകാറുണ്ട്. ഇങ്ങനെ പലഹാരക്കൊതിയന്മാരായ പലരുടെയും പ്രശ്നമാണ് എങ്ങനെ ഇവ കേടുകൂടാതെ സൂക്ഷിച്ച് ഉപയോഗിക്കാം എന്നത്.
ഓരോ ഭക്ഷണവും നാശമാകുന്നതിന് ഒരു സമയമുണ്ട്. പഴകിയ പലഹാരങ്ങൾ പാഴാക്കേണ്ടെന്ന് കരുതി കഴിച്ചാൽ നമുക്ക് വലിയ ആരോഗ്യപ്രശ്നങ്ങളുണ്ടാകും.എന്നാലും നമ്മുടെ അശ്രദ്ധ കൊണ്ട് അവ നാശമാകാതെ സൂക്ഷിച്ചാൽ പ്രിയപ്പെട്ട നമ്മുടെ പലഹാരങ്ങൾക്ക് അൽപ്പം കൂടി ആയുസ് നീട്ടി കിട്ടും. എന്താണാ കുഞ്ഞു കുഞ്ഞു വഴികളെന്നല്ലേ
അരിപ്പൊടി കൊണ്ടുണ്ടാക്കുന്ന അച്ചപ്പം,കുഴലപ്പം,മുറുക്ക് പോലുള്ള പലഹാരങ്ങൾക്ക് പൊതുവേ ആയുസ് കൂടതലാണ്. അവ കാറ്റു കടക്കാത്ത കണ്ടെയ്നറുകളിൽ സൂക്ഷിച്ചാൽ തണുക്കാതെ നല്ല മൊരി മൊരിയായി കഴിക്കാം. ഗ്ലാസ് പാത്രങ്ങളിൽ സൂക്ഷിക്കുന്നതും പലഹാരങ്ങളുടെ ആയുസ് വർദ്ധിപ്പിക്കും.
തേങ്ങ ചേർത്ത പലഹാരങ്ങൾ മിക്കവയും പെട്ടെന്ന് കേടാവുന്നവയാണ്. അത്തരം പലഹാരങ്ങൾ പരമാവധി വേഗത്തിൽ കഴിച്ചു തീർക്കാൻ ശ്രമിക്കുക. തേങ്ങ ചേർത്ത പലഹാരങ്ങൾ ഓരോ ഐറ്റവും വേറെ വേറെ പാത്രങ്ങളിൽ സൂക്ഷിച്ചാൽ അൽപ്പം കൂടി ആയുസ് നീട്ടിയെടുക്കാം.
വെളിച്ചെണ്ണയിൽ വറുത്തെടുത്ത പലഹാരങ്ങൾ കാറി പോകാതിരിക്കാൻ അവയുടെ എണ്ണയുടെ അംശം കുറച്ചധികം കടലാസിൽ ഒപ്പിയെടുക്കാം. ഗുണമേന്മയുള്ള വെളിച്ചെണ്ണ മാത്രം പലഹാരങ്ങൾ പാകം ചെയ്യാൻ ശ്രമിക്കുക. പലഹാരങ്ങൾ റഫ്രിജറേറ്ററിലും സൂക്ഷിക്കാം.
