പോപ്പുലർഫ്രണ്ട്‌ ഹർത്താലിൽ ഭാരത് ജോഡോ യാത്ര നിർത്തി; ലജ്ജാകരമെന്ന് ബിജെപി നേതാവ്

ന്യൂഡൽഹി: പോപ്പുലർ ഫ്രണ്ടിന്റെ ഹർത്താലിനെ തുടർന്ന് രാഹുൽ ഗാന്ധി നയിക്കുന്ന ഭാരത് ജോഡോ യാത്ര നിർത്തിയത്തിനെതിരെ ബിജെപി നേതാവ് കപിൽ മിശ്ര. ഇസ്ലാമിക ഭീകര സംഘടനയായ പോപ്പുലർ ഫ്രണ്ട് ആഹ്വാനം ചെയ്ത ഹർത്താലിൽ എന്തിനാണ് യാത്ര നിർത്തുന്നത്. വളരെ ലജ്ജാകരമായ കാര്യമാണിതെന്നും മിശ്ര ചൂണ്ടിക്കാട്ടി

ബിജെപി നേതാവ് പറയുന്നതിൽ യാതൊരു കഴമ്പുമില്ലെന്ന് ചൂണ്ടിക്കാട്ടി കോൺഗ്രസ്സ് മീഡിയ ആന്റ് പബ്ലിസിറ്റി ചെയർമാനായ പവൻ ഖേര രംഗത്ത് വന്നു. ഭാരത് ജോഡോ യാത്രയ്‌ക്ക് ആഴ്ചയിൽ ഒരു ദിവസം അവധി ഉള്ളതാണ്. ആർ എസ് എസ് സർസംഘചാലക് മോഹൻ ഭാഗവത് കഴിഞ്ഞ ദിവസം മുസ്ലിം നേതാക്കളുമായി കൂടിക്കാഴ്ച നടത്തിയിരുന്നല്ലോ? ഇത് പോപ്പുലർ ഫ്രണ്ടുമായുള്ള ഏതെങ്കിലും ധാരണയുടെ ഭാഗമായിട്ടാണോ എന്ന് ഖേര മറുപടിയായി ചോദിച്ചു.

കേരളത്തിൽ പോപ്പുലർ ഫ്രണ്ട് നടത്തിയ ഹർത്താലിൽ നിരവധി നാശ നഷ്ടങ്ങളാണ് ഉണ്ടായത്. ട്രാൻസ്‌പോർട്ട് ബസ്സുകളും, വാഹനങ്ങളും, കടകളും അക്രമികൾ അടിച്ചു തകർത്തു. രാജ്യത്ത് തീവ്രവാദ പ്രവർത്തനങ്ങൾ ചൂണ്ടിക്കാട്ടി കേന്ദ്ര അന്വേഷണ ഏജൻസികൾ നടത്തിയ റെയ്ഡിൽ 22ഓളം പോപ്പുലർ ഫ്രണ്ട് പ്രവർത്തകരെ അറസ്റ്റ് ചെയ്യുകയും ഓഫീസുകളിൽ നിന്നും നിർണായക രേഖകൾ കണ്ടെത്തുകയും ചെയ്തു.