ചിക്കൻ കറി ഇഷ്ടമില്ലാത്ത മലയാളികൾ കുറവായിരിക്കും അല്ലേ.. വളരെ എളുപ്പത്തിൽ രുചികരമായി തയ്യാറാക്കാൻ കഴിയുന്ന ഒരു നോൺ-വെജ് വിഭവമായതിനാലാണ് ചിക്കൻ കറിക്ക് ആരാധകരേറുന്നത്.
ഒരു കിലോ ചിക്കൻ വെറും മൂന്ന് ചേരുവയിൽ തയ്യാറാക്കാൻ കഴിഞ്ഞാൽ സമയവും അധ്വാനവും എത്രമാത്രം ലാഭിക്കാമല്ലേ.. ജോലിക്ക് പോകുന്നവർക്കും തിരക്കുള്ളവർക്കും മടിയുള്ളവർക്കുമെല്ലാം ഇതുപകരിക്കും. എങ്ങനെയാണ് വളരെ വേഗം വളരെ കുറച്ച് ചേരുവ കൊണ്ട് ചിക്കൻ പാകം ചെയ്തെടുക്കുന്നതെന്ന് നോക്കാം..
പ്രധാനമായും ഈ വിഭവത്തിനായി വേണ്ട മൂന്ന് ചേരുവകൾ ചെറിയ ഉള്ളിയും ചതച്ച വറ്റൽമുളകും വെളിച്ചെണ്ണയുമാണ്.
കാൽ കിലോ ഉള്ളിയാണ് ഒരു കിലോ ചിക്കൻ ഇത്തരത്തിൽ പാകം ചെയ്യാൻ ആവശ്യമായത്. ഇത് നല്ലപോലെ ചതച്ചെടുക്കുക. പാകം ചെയ്യാനായി ഒരു പാൻ അല്ലെങ്കിൽ ചട്ടി അടുപ്പത്ത് വെക്കുക. വെളിച്ചെണ്ണ ആവശ്യത്തിന് ഒഴിച്ച് ചൂടായതിന് ശേഷം ചതച്ചുവെച്ച ചുവന്നുള്ളി ഇട്ട് വഴറ്റിയെടുക്കുക. ചെറിയ തീയിൽ നല്ലപോലെ എണ്ണയിൽ വഴറ്റിയെടുത്താൽ ഒരു അഞ്ച് ടേബിൾ സ്പൂൺ ചതച്ച വറ്റൽമുളക് ചേർത്ത് ഇളക്കുക.
മുളക് നല്ലപോലെ മൂത്ത് പാകമായി വന്നാൽ ഇതിലേക്ക് കഴുകി വെച്ച ചിക്കൻ ഇട്ടുകൊടുക്കുക. നല്ലപോലെ മസാല ചിക്കനിൽ ചേർത്ത് ഇളക്കുക. ഈ ഘട്ടത്തിൽ വെള്ളം ചേർക്കേണ്ടതില്ല. നല്ലതുപോലെ മിക്സ് ചെയ്തതിന് ശേഷം ആവശ്യത്തിന് ഉപ്പ് ചേർത്ത് പാത്രം അടച്ചുവെച്ച് പാകം ചെയ്ത് എടുക്കുക. ഇടയ്ക്ക് ഇളക്കി കൊടുക്കുന്നത് നല്ലതാണ്.
പ്രധാനമായും വെളിച്ചെണ്ണയും ചെറിയ ഉള്ളിയും ചതച്ച വറ്റൽമുളകും മാത്രമാണ് ഇതിന് ആവശ്യമായ ചേരുവകൾ. കറിക്ക് രുചി കൂടാൻ തുടക്കത്തിൽ ഉള്ളി ചേർക്കുന്നതിന് മുമ്പായി വേപ്പിലയും ഏറ്റവുമൊടുവിൽ ചിക്കൻ അടുപ്പിൽ നിന്ന് ഇറക്കുന്നതിന് മുമ്പ് അൽപം സ്വർക്ക അഥവാ വിനാഗിരി ചേർത്തു നൽകാവുന്നതാണ്. ഇത്രയുമായാൽ സ്വാദിഷ്ടമായ ചിക്കൻ കറി തയ്യാർ..
Comments