ഒറ്റാവ: കാനഡയിലെ ഭഗവദ്ഗീത പാർക്ക് തകർത്ത സംഭവത്തെ അപലപിച്ച് ഇന്ത്യ. സാമൂഹ്യവിരുദ്ധരുടെ നടപടി വിദ്വേഷ കുറ്റകൃത്യമാണെന്ന് ഒറ്റാവയിലുള്ള ഇന്ത്യൻ ഹൈക്കമ്മീഷൻ പ്രതികരിച്ചു.
We condemn the hate crime at the Shri Bhagvad Gita Park in Brampton. We urge Canadian authorities & @PeelPolice to investigate and take prompt action on the perpetrators @MEAIndia @cgivancouver @IndiainToronto pic.twitter.com/mIn4LAZA55
— India in Canada (@HCI_Ottawa) October 2, 2022
കാനഡയിലെ ബ്രാംപ്ടണിലെ ശ്രീ ഭഗവദ്ഗീത പാർക്കിലാണ് സംഭവമുണ്ടായത്. പാർക്കിന്റെ പേര് ഏതാനും ദിവസങ്ങൾക്ക് മുമ്പായിരുന്നു ശ്രീ ഭഗവദ്ഗീതയെന്ന് നാമകരണം ചെയ്തത്. പാർക്കിൽ വിദ്വേഷ കുറ്റകൃത്യം ചെയ്തവരെ നിയമത്തിന് മുന്നിൽ കൊണ്ടുവരണമെന്നും കർശന നടപടിയെടുക്കണമെന്നും ഇന്ത്യൻ ഹൈക്കമ്മീഷൻ ആവശ്യപ്പെട്ടു.
പാർക്കിന്റെ പേര് പരാമർശിക്കുന്ന സൈൻ-ബോർഡാണ് അക്രമികൾ തകർത്തത്. സംഭവത്തിൽ വിശദമായ അന്വേഷണത്തിന് ഉത്തരവിട്ടതായി ബ്രാംപ്ടൺ മേയർ പാട്രിക് ബ്രൗൺ വ്യക്തമാക്കി. ഇത്തരം നടപടികൾക്കെതിരെ യാതൊരു സഹിഷ്ണുതയും പുലർത്തുകയില്ലെന്നും അദ്ദേഹം കൂട്ടിച്ചേർത്തു.
ഏകദേശം 3.75 ഏക്കറോളം വ്യാപിച്ച് കിടക്കുന്ന പാർക്കിനായിരുന്നു അധികൃതർ ശ്രീ ഭഗവദ്ഗീതയെന്ന് പേരിട്ടത്. ഹരിയാന സർക്കാർ പുറത്തിറക്കിയ പ്രസ്താവന പ്രകാരം ഇന്ത്യയ്ക്ക് പുറത്ത് ഭഗവദ്ഗീതയെന്ന് നാമകരണം ചെയ്ത ഏക സംഭവമായിരുന്നു ഇത്. ഭഗവാൻ കൃഷ്ണന്റെയും അർജ്ജുനന്റെയും ഉൾപ്പെടെ നിരവധി പുരാണ കഥാപാത്രങ്ങളുടെ ബിംബങ്ങളും പാർക്കിൽ സ്ഥാപിച്ചിട്ടുണ്ട്. കഴിഞ്ഞ ബുധനാഴ്ചയായിരുന്നു ഇവ അനാച്ഛാദനം ചെയ്തത്.
കാനഡയിലുള്ള ഇന്ത്യൻ വിദ്യാർത്ഥികൾ ഉൾപ്പെടെ എല്ലാ ഇന്ത്യൻ പൗരന്മാർക്കും കഴിഞ്ഞ ദിവസം ഹൈക്കമ്മീഷൻ പ്രത്യേക അറിയിപ്പ് നൽകിയിരുന്നു. മേഖലയിൽ ഇന്ത്യാവിരുദ്ധ പ്രവർത്തനങ്ങളും വിദ്വേഷ നടപടികളും വർധിച്ച് വരികയാണെന്നും ഇന്ത്യക്കാർ ജാഗരൂകരായിരിക്കണമെന്നുമായിരുന്നു അറിയിപ്പിൽ പരാമർശിച്ചിരുന്നത്. ഇത് പുറപ്പെടുവിച്ച് പത്ത് ദിവസങ്ങൾ പിന്നിടുമ്പോഴാണ് ഭഗവദ്ഗീത പാർക്കിൽ ആക്രമണമുണ്ടായിരിക്കുന്നത്. ഈ വർഷം മാത്രം കാനഡയിലെ രണ്ട് ഹിന്ദു ക്ഷേത്രങ്ങൾക്ക് നേരെ ആക്രമണം നടന്നിരുന്നു.
Comments