പാമ്പ് എന്ന് കേൾക്കുമ്പോൾ തന്നെ പലർക്കും പേടിയാണ്. പ്രത്യേകിച്ച് പെരുമ്പാമ്പിനെ പോലെ നല്ല നീളവും വണ്ണവുമുള്ള പാമ്പുകളെ. അപകടകാരികളാണെങ്കിലും ഇവ മനുഷ്യന് ഭീഷണിയല്ല. അങ്ങോട്ട് എന്തെങ്കിലും ചെയ്താൽ മാത്രമേ പാമ്പുകൾ നമ്മേ ഉപദ്രവിക്കാറുള്ളൂ. എന്നാൽ വീട്ടിലോ പറമ്പിലോ ഒരു പാമ്പിനെ കണ്ടാൽ പാമ്പ് പിടുത്തക്കാരുടെ സഹായത്തോടെ അതിനെ പിടികൂടി വനത്തിൽ കൊണ്ട് വിടുകയാണ് ചെയ്യാറുള്ളത്. ഇത്തരത്തിൽ ഒരു പാമ്പിനെ പിടികൂടുന്ന വീഡിയോ സമൂഹമാദ്ധ്യമങ്ങളിൽ ശ്രദ്ധ നേടുകയാണ്.
ഒരു പെരുമ്പാമ്പിന്റെ വീഡിയോയാണിത്. വീടിന്റെ പുരപ്പുറത്താണ് പാമ്പിനെ കണ്ടെത്തിയത്. ഇതോടെ ഇതിനെ പിടികൂടാൻ ആളുകളെത്തി. എന്നാൽ പാമ്പ് നേരെ അടുത്തുളള മരത്തിന്റെ ചില്ലയിലേക്ക് കയറാൻ ശ്രമിച്ചു. അതിനായി പാമ്പ് പകുതിയോളം ഉയരുന്നതും കാണാനാകും. ഏകദേശം 4 അടിയോളം ഉയരത്തിൽ പൊങ്ങിയ പെരുമ്പാമ്പ്, തന്റെ ലക്ഷ്യം കണ്ടെത്തി. സ്നേക്സ് ഓഫ് ഇന്ത്യ എന്ന പേജിലാണ് വീഡിയോ പങ്കുവെച്ചിരിക്കുന്നത്.
വീഡിയോ പ്രചരിച്ചതോടെ ഇതിന് പ്രതികരണവുമായി നിരവധി പേർ രംഗത്തെത്തി. ഇതെന്താ പാമ്പ് എഴുന്നേറ്റ് നിൽക്കുകയാണോ എന്ന് ചിലർ ചോദിക്കുന്നുണ്ട്. പാമ്പ് ഇത്രയും നീളത്തിൽ ഉയരുമെന്ന് അറിയില്ലായിരുന്നു എന്നും ചിലർ പ്രതികരിക്കുന്നുണ്ട്.
