മൈസൂർ: ഭാരത് ജോഡോ യാത്രയുടെ ഭാഗമായി കർണാടകയിൽ പര്യടനം നടത്തുന്ന കോൺഗ്രസ് നേതാവ് രാഹുൽ ഗാന്ധി സുട്ടൂർ മഠത്തിൽ സന്ദർശനം നടത്തി. കേരളത്തിൽ നിന്ന് ഭാരത് ജോഡോ യാത്ര കർണാടകയിലെത്തി നാലാം ദിവസമാണിന്ന്. രാവിലെയാണ് രാഹുൽ മഠത്തിലെത്തിയത്.
ശിവരാത്രി ദേശികേന്ദ്ര സ്വാമിജിയുടെ അനുഗ്രഹം വാങ്ങിയാണ് രാഹുൽ മടങ്ങിയത്. ഞായറാഴ്ച കനത്ത മഴയിൽ മൈസൂരുവിൽ നടന്ന റാലിയിൽ പ്രസംഗിക്കുന്ന രാഹുലിന്റെ ദൃശ്യങ്ങൾ കോൺഗ്രസ് പ്രവർത്തകർ സമൂഹമാദ്ധ്യമങ്ങളിലൂടെ പരമാവധി പ്രചരിപ്പിച്ചിരുന്നു. ഇതിന് പിന്നാലെയാണ് തിങ്കളാഴ്ച രാവിലെ അദ്ദേഹം മഠത്തിൽ സന്ദർശനം നടത്തിയത്.
പ്രതിപക്ഷ നേതാവ് സിദ്ധരാമയ്യയും എഐസിസി നേതാക്കളും രാഹുലിന് ഒപ്പം ഉണ്ടായിരുന്നു. രാഹുലിനെ പ്രത്യേക തലപ്പാവ് അണിയിച്ച ദേശികേന്ദ്ര സ്വാമിജി ദുർഗാവിഗ്രഹവും നൽകി.
