പുതിയ പാർട്ടിയായി ദേശീയതലത്തിലേക്ക്; പ്രവർത്തകരുടെ വീര്യം കൂട്ടാൻ മദ്യവും കോഴിയും; തെലങ്കാനയിൽ ടിആർഎസ് വിവാദത്തിൽ

ഹൈദരാബാദ് : പുതിയ പാർട്ടി ആരംഭിക്കുന്നതിന് മുന്നോടിയായി തെലങ്കാനയിൽ കോഴിയും മദ്യവും വിതരണം ചെയ്ത് ടിആർഎസ്. തെലങ്കാനയിലെ ഈസ്റ്റ് വാറങ്കൽ മണ്ഡലത്തിലുള്ള ചുമട്ട് തൊഴിലാളികൾക്കാണ് തെലങ്കാന രാഷ്‌ട്ര സമിതി നേതാവായ രജനല ശ്രീഹരി ഒരു കുപ്പി മദ്യവും ഓരോ കോഴികളേയും വിതരണം ചെയ്തത്. തെലങ്കാന മുഖ്യമന്ത്രി ചന്ദ്രശേഖര റാവു, വ്യവസായ മന്ത്രി കെടി രാമ റാവു എന്നിവരുടെ കട്ടൗട്ടറുകൾ സ്ഥാപിച്ചായിരുന്നു ചടങ്ങ്.

200 കുപ്പി മദ്യവും 200 കോഴികളെയുമാണ് വിതരണത്തിനായി എത്തിച്ചത്. ഇവയെ നേതാവ് തന്നെ തൊഴിലാളികൾക്ക് എടുത്ത് കൊടുക്കുന്നതും, ഫോട്ടോയ്‌ക്ക് പോസ് ചെയ്യുന്നതും കാണാനാകും. ടിആർഎസിന്റെ ജനറൽ ബോഡി യോഗം നാളെ തെലങ്കാന ഭവനിൽ വെച്ച് നടക്കുമെന്ന് ചന്ദ്രശേഖർ റാവുവിന്റെ ഓഫീസ് അറിയിച്ചു.

#WATCH | TRS leader Rajanala Srihari distributes liquor bottles and chicken to locals ahead of Telangana CM KC Rao launching a national party tomorrow, in Warangal pic.twitter.com/4tfUsPgfNU

— ANI (@ANI) October 4, 2022

പുതിയ പാർട്ടി രൂപീകരിച്ച് ദേശീയ രാഷ്‌ട്രീയത്തിലേക്ക് പ്രവേശിക്കാനാണ് കെ ചന്ദ്രശേഖര റാവു ഒരുങ്ങുന്നത്. തെലങ്കാന രാഷ്‌ട്ര സമിതിയെ ദേശീയ പാർട്ടിയായി പുനർനാമകരണം ചെയ്തുകൊണ്ടുള്ള പ്രഖ്യാപനം നാളത്തെ യോഗത്തിൽ ഉണ്ടായേക്കും. ദേശീയ രാഷ്‌ട്രീയത്തോടുള്ള തന്റെ സമീപനത്തിന്റെ വിശദാംശങ്ങൾ ടിആർഎസ് പ്രസിഡന്റ് വെളിപ്പെടുത്തിയേക്കുമെന്നും പാർട്ടിയുടെ അണികളുമായും ഇത് ചർച്ച ചെയ്യുമെന്നുമാണ് പ്രതീക്ഷ.