ന്യൂഡൽഹി: രാജ്യതലസ്ഥാനം ഉൾപ്പെടെ നാല് നഗരങ്ങളിൽ റിലയൻസ് ജിയോ 5ജി ബീറ്റ ട്രയൽസ് ആരംഭിച്ചു. ഡൽഹിക്ക് പുറമെ മുംബൈ, കൊൽക്കത്ത, വാരാണസി എന്നിവിടങ്ങളിലാണ് ട്രയൽസ് ആരംഭിച്ചത്. സെക്കൻഡിൽ 1 ജിബിക്ക് മുകളിൽ ഡൗൺലോഡ് സ്പീഡ് കിട്ടുന്നതായി ഉപഭോക്താക്കൾ അറിയിച്ചു.
ഘട്ടം ഘട്ടമായി ഈ പ്രധാന നഗരങ്ങളിൽ എല്ലായിടത്തും 5ജി സേവനം ലഭ്യമാക്കുമെന്ന് റിലയൻസ് ജിയോ അറിയിച്ചു. രാജ്യത്തെ ഒരേയൊരു ട്രൂ 5ജി സർവീസ് തങ്ങളുടേതാണ് എന്ന് ജിയോ അവകാശപ്പെടുന്നു. വ്യവസായികൾക്കും വിദ്യാർത്ഥികൾക്കും ഉപകാരപ്രദമായ 5ജി പ്ലാനുകൾ ജിയോ ഉടൻ അവതരിപ്പിക്കും എന്നാണ് വിവരം.
മറ്റുള്ള നഗരങ്ങളിലും വൈകാതെ ജിയോ 5ജി ബീറ്റാ ട്രയൽസ് ആരംഭിക്കുമെന്ന് കമ്പനി അധികൃതർ അറിയിച്ചു. നഗരങ്ങളിൽ കവറേജ് പൂർണ്ണമായും ലഭ്യമാകുന്നത് വരെ ബീറ്റ ട്രയൽസ് തുടരും.
എല്ലാ 5ജി ഹാൻഡ്സെറ്റുകളിലും ജിയോ 5ജി സിം കാർഡുകൾ ഉപയോഗിക്കാൻ സാധിക്കും. കുറഞ്ഞ ചിലവിൽ മികച്ച നിലവാരമുള്ള 5ജി സേവനം പരിധിയില്ലാതെ ഉപഭോക്താക്കൾക്ക് ലഭ്യമാക്കുക എന്നതാണ് കമ്പനിയുടെ നയമെന്ന് റിലയൻസ് ജിയോ അറിയിച്ചു.
