തിരുവനന്തപുരം: ശരീര സൗന്ദര്യ മത്സരങ്ങൾ സംഘടിപ്പിക്കാൻ കേരളാ പോലീസ്. ഒക്ടോബർ 8-ന് (ശനിയാഴ്ച) തിരുവനന്തപുരത്തെ ഗാന്ധിപാർക്കിലാണ് ശരീര സൗന്ദര്യ മത്സരങ്ങൾ പോലീസ് സംഘടിപ്പിക്കുന്നത്. മത്സരത്തിൽ ഒന്നാം സ്ഥാനം നേടുന്ന വ്യക്തിക്ക് മിസ്റ്റർ കേരള പോലീസ് 2022 പട്ടം സമ്മാനിക്കും. പത്ത് ഇനങ്ങളിലാണ് മത്സരങ്ങൾ നടക്കുക എന്ന കേരളാ പോലീസ് അറിയിച്ചു.
ശനിയാഴ്ച വൈകിട്ട് ആറുമണിക്ക് കിഴക്കേകോട്ട ഗാന്ധിപാർക്കിൽ നടക്കുന്ന ചടങ്ങിൽ സംസ്ഥാന പോലീസ് മേധാവി അനിൽകാന്ത് മുഖ്യാതിഥിയാകും. കലാംഗൻ സെന്റർ ഫോർ ഡാൻസ് ആൻറ് മ്യൂസിക് അവതരിപ്പിക്കുന്ന ക്ലാസിക്കൽ നൃത്തം, മനു പൂജപ്പുരയുടെ മാജിക് ഷോ, നേഹാ പ്രദീപും സംഘവും അവതരിപ്പിക്കുന്ന ഗാനമേള, മന്ത്ര ഡാൻസ് ആൻറ് ഫിറ്റ്നെസ് സ്റ്റുഡിയോയുടെ ഫ്യൂഷൻ ഡാൻസ്, കേരളാ പോലീസ് വനിത ജിം ടീമിന്റെ തിരുവാതിര എന്നിവയും ഉണ്ടായിരിക്കും.
