കീവേ തങ്ങളുടെ പുതിയ മോട്ടോർസൈക്കിൾ ഇന്ത്യയിൽ പുറത്തിറക്കി. SR125 എന്ന മോഡലാണ് കമ്പനി പുറത്തിറക്കിയിരിക്കുന്നത്. 1.19 ലക്ഷം രൂപയാണ് വാഹനത്തിന്റെ എക്സ്ഷോറും വില. 125 സിസി കമ്മ്യൂട്ടർ മോട്ടോർസൈക്കിൾ വിഭാഗത്തിൽപ്പെടുന്ന വാഹനമാണ് കീവേ SR125. നിലവിൽ കിവേ പുറത്തിറക്കിയ മോട്ടോർസൈക്കിളിൽ ഏറ്റവും വില കുറവുള്ള മോഡലാണിത്. ഗ്ലോസി റെഡ്, ഗ്ലോസി വൈറ്റ്, ഗ്ലോസി ബ്ലാക്ക് എന്നിങ്ങനെ മൂന്ന് നിറങ്ങളിലാണ് വാഹനം കമ്പനി വാഗ്ദാനം ചെയ്യുന്നത്. വാഹനത്തിന് ഇന്ത്യൻ നിരത്തിൽ നേരിട്ട് ഒരു എതിരാളിയില്ല. കഴിഞ്ഞ 5 മാസത്തിനിടെ ഇന്ത്യൻ വിപണിയിൽ കീവേ പുറത്തിറക്കുന്ന ഏഴാമത്തെ മോഡലാണ് SR125.
ഒറ്റ നോട്ടത്തിൽ യമഹയുടെ RX 100-ന് മാറ്റങ്ങൾ വരുത്തി പുതുക്കിയെടുത്തിന് തുല്യമായി തോന്നും കീവേ SR125. ബ്ലോക്ക്-പാറ്റേൺ ടയറുകൾ, റിബഡ് സീറ്റ്, വൃത്താകൃതിയിലുളള ചെറിയ ഹെഡ്ലാമ്പ്, റെട്രോ-ലുക്ക് ഫ്യുവൽ ടാങ്ക്, സ്പോക്ക്ഡ് റിമ്മുകൾ, വൃത്താകൃതിയിലുള്ള ടെയിൽ ലാമ്പ്, ടേൺ ഇൻഡിക്കേറ്ററുകൾ എന്നിവയാണ് വാഹനത്തിന്റെ പ്രധാന ആകർഷണം. കൂടാതെ, ഡിജിറ്റൽ ഇൻസ്ട്രുമെന്റ് ക്ലസ്റ്റർ, എൽഇഡി ഡേടൈം റണ്ണിംഗ് ലാമ്പ്, ബിൽറ്റ്-ഇൻ-എൻജിൻ കട്ട് ഓഫ് സ്വിച്ച് ഉള്ള സൈഡ് സ്റ്റാൻഡ്, കോമ്പി ബ്രേക്കിംഗ് സിസ്റ്റം, ഹസാർഡ് സ്വിച്ച് എന്നിവയും കീവേ SR125-ന് വാഗ്ദാനം ചെയ്യുന്നു.
9,000 ആർപിഎമ്മിൽ 9.5 ബിഎച്ച്പി കരുത്തും 7,500 ആർപിഎമ്മിൽ 8.2 എൻഎം പീക്ക് ടോർക്കും ഉത്പാദിപ്പിക്കുന്ന 125സിസി, ഫോർ-സ്ട്രോക്ക്, സിംഗിൾ സിലിണ്ടർ, ഫ്യൂവൽ ഇഞ്ചക്റ്റഡ് എൻജിനാണ് SR125-ന് കരുത്ത് പകരുന്നത്. യൂണിറ്റ് 5-സ്പീഡ് ഗിയർബോക്സുമായി ബന്ധിപ്പിച്ചിരിക്കുന്നു. സ്റ്റാൻഡേർഡ് ഫിറ്റ് ഡിസ്ക് ബ്രേക്കുകൾ വഴിയാണ് സ്റ്റോപ്പിംഗ് പവർ ലഭിക്കുന്നത്. മുന്നിൽ 300 എംഎം യൂണിറ്റും പിന്നിൽ 240 എംഎം യൂണിറ്റും. മോട്ടോർസൈക്കിളിന് കോമ്പി ബ്രേക്കിംഗ് സംവിധാനവും ലഭിക്കുന്നു. SR125 ന് വെറും 120 കിലോഗ്രാം ഭാരമാണുള്ളതെന്നും ഇതിന് 14.5 ലിറ്റർ ഇന്ധന ടാങ്കാണ് ലഭിക്കുന്നതെന്നും കീവേ പറയുന്നു. വാഹനത്തിന്റെ ബുക്കിംഗ് ആരംഭിച്ചിട്ടുണ്ട്. 1000 രൂപയാണ് ബുക്കിംഗ് തുകയായി നിശ്ചയിച്ചിരിക്കുന്നത്. ഒക്ടോബർ അവസാനത്തോടെ ഡെലിവറികൾ നടത്തും.
