ന്യൂഡൽഹി: വെബ് സീരീസിലൂടെ സൈനികരെ അപമാനിച്ച നിർമ്മാതാവ് ഏകതാ കപൂറിനെതിരെ രൂക്ഷ വിമർശനവുമായി സുപ്രീംകോടതി. രാജ്യത്തെ യുവജനതയുടെ മനസ്സ് ഏകതാ കപൂർ മലിനമാക്കുകയാണെന്ന് കോടതി പ്രതികരിച്ചു. പോലീസിന്റെ അറസ്റ്റ് വാറന്റ് പിൻവലിക്കാൻ ഉത്തരവിടണമെന്ന് ആവശ്യപ്പെട്ടുള്ള ഏകതയുടെ അപേക്ഷ പരിഗണിക്കുന്നതിനിടെയായിരുന്നു കോടതിയുടെ രൂക്ഷ വിമർശനം.
വെബ്സീരീസിലൂടെ നിങ്ങൾ രാജ്യത്തെ യുവതലമുറയുടെ മനസ്സ് മലിനമാക്കുകയാണ്. ഇന്ന് ഒടിടി പ്ലാറ്റ് ഫോം എല്ലാവർക്കും ലഭ്യമാണ്. ഇത് വഴി വെബ്സീരിസും എല്ലാവരിലും എത്തിയിട്ടുണ്ട്. ഉചിതമായത് തിരഞ്ഞെടുക്കാൻ നിങ്ങൾ എന്ത് അവസരമാണ് ഇന്നത്തെ തലമുറയ്ക്ക് നൽകുന്നത്?. ഇതിന് പകരം അവരുടെ മനസ്സ് മലിനപ്പെടുത്തുന്നു.- കോടതി അഭിപ്രായപ്പെട്ടു.
‘XXX ‘ എന്ന വെബ്സീരിസിലാണ് ഏകതാ കപൂർ സൈന്യത്തെ മോശമായി ചിത്രീകരിച്ചിരിക്കുന്നത്. ഒടിടി പ്ലാറ്റ്ഫോമിലൂടെ പുറത്തുവിട്ട വെബ് സീരീസിൽ സൈനികരെ അപമാനിക്കുന്ന തരത്തിലുള്ള ഉള്ളടക്കങ്ങളാണ് ഉള്ളത്. ഏകതാ കപൂർ സൈനികരെ അപമാനിക്കുകയും, അവരുടെ കുടുംബങ്ങളുടെ വികാരങ്ങളെ വ്രണപ്പെടുത്തുകയും ചെയ്തുവെന്ന് ചൂണ്ടിക്കാട്ടി വിരമിച്ച സൈനികൻ ശംഭുകുമാർ ബിഹാറിലെ ബെഗുസാരായ് കോടതിയെ സമീപിച്ചിരുന്നു. തുടർന്ന് കോടതിയാണ് ഏകതാ കപൂറിനെതിരെ അറസ്റ്റ് വാറന്റ് പുറപ്പെടുവിച്ചത്. ഇതിനെതിരെയാണ് ഏകതാ സുപ്രീംകോടതിയിൽ ഹർജി നൽകിയത്.
