‘നമ്മൾ എന്ത് കഴിക്കുന്നുവോ അതാണ് നമ്മൾ’ എന്ന് പണ്ടു കാലത്തെ കാർന്നവന്മാർ പറയാറുണ്ട്. ആ പഴഞ്ചൊല്ലുമായി ബന്ധപ്പെടുത്താവുന്ന ഒരു അവയവമാണ് കരൾ. നമ്മുടെ ശരീരത്തിലെ മാലിന്യങ്ങൾ അരിക്കുക, വിറ്റാമിനുകളെയും ധാതുക്കളെയും സംഭരിക്കുക, ദഹനത്തിനും വളർച്ചയ്ക്കും സഹായിക്കുക എന്നിങ്ങനെ നിരവധി പ്രവർത്തനങ്ങൾ കരൾ നിർവ്വഹിക്കുന്നു. അതുകൊണ്ട് തന്നെ കരളിന്റെ സംരക്ഷണം നാം കഴിക്കുന്ന ഭക്ഷണങ്ങളെ ആശ്രയിച്ചുകൂടി ഇരിക്കുന്നു. ചില ഭക്ഷണപദാർത്ഥങ്ങൾ കരൾ വീക്കം ഉണ്ടാക്കുകയും കരളിനെ തകരാറിലാക്കുകയും ചെയ്യുന്നു. അതിനാൽ, കരൾ സുരക്ഷിതവും ആരോഗ്യകരവുമായി നിലനിർത്താൻ കരളിന്റെ ആരോഗ്യത്തിനാവശ്യമായ ഭക്ഷണങ്ങൾ കഴിക്കേണ്ടതുണ്ട്. കരളിന്റെ ആരോഗ്യം മെച്ചപ്പെടുത്തുന്നതിന് പോഷകാഹാര വിദഗ്ദർ നിർദ്ദേശിക്കുന്ന 5 ഭക്ഷണങ്ങൾ എന്തൊക്കെയാണെന്ന് നോക്കാം,
1. വീറ്റ് ഗ്രാസ്( മുളപ്പിച്ച ഗോതമ്പ് നട്ട് കിളിപ്പിക്കുന്നത്) ജ്യൂസ്
ഹരിതകം (Chlorophyl) നല്ലപോലെ അടങ്ങിയിരിക്കുന്ന വീറ്റ് ഗ്രാസ് വിറ്റമിനുകളുടെയും മിനറലുകളുടെയും ഒരു കലവറയാണ്. ദിവസവും വെറും വയറ്റിൽ വീറ്റ് ഗ്രാസ് ജ്യൂസ് കുടിച്ചാൽ ദഹനസംബന്ധമായ അസുഖങ്ങൾ ഇല്ലാതാക്കും. കരളിന്റെ ആരോഗ്യം നിലനിർത്തും.
2. ബീറ്റ്റൂട്ട് ജ്യൂസ്
ബീറ്റ്റൂട്ട് ജ്യൂസ് നൈട്രേറ്റുകളുടെയും ആന്റി ഓക്സിഡന്റുകളുടെയും ഉറവിടമാണ്. ഇത് കരളിലെ ഓക്സിഡേറ്റീവ് കേടുപാടുകളും വീക്കവും കുറയ്ക്കും.
3. മുന്തിരി ജ്യൂസ്
മുന്തിരിയിൽ ധാരാളം ഗുണം ചെയ്യുന്ന സംയുക്തങ്ങൾ അടങ്ങിയിട്ടുണ്ട്. റെസ്വെരാട്രോൾ എന്ന രാസ സംയുക്തം മുന്തിരിയിൽ അടങ്ങിയിരിക്കുന്നു. ഇത് ആന്റി ഓക്സിഡന്റുകളുടെ അളവ് വർദ്ധിപ്പിക്കുന്നു. ആന്റി ഓക്സിഡന്റുകളുടെ പ്രവർത്തനം മൂലം കരളിന്റെ ആരോഗ്യവസ്ഥയ്ക്ക് കുറവു വരാതെ സംരക്ഷണം നൽകുന്നു. കരളിലെ വീക്കം കുറയ്ക്കാൻ മുന്തിരി സഹായിക്കുന്നു.
4. ക്രൂസിഫറസ് പച്ചക്കറികൾ
കാബേജ്, കോളിഫ്ലവർ, ബ്രോക്കൊളി തുടങ്ങിയ ക്രൂസിഫറസ് പച്ചക്കറികൾ കരളിലെ വിഷാംശം ഇല്ലാതാക്കുന്നു. മാത്രമല്ല, കരളിനെ കേടുപാടുകളിൽ നിന്ന് സംരക്ഷിക്കുന്നതിന് ആവശ്യമായ എൻസൈമുകളുടെ അളവ് വർദ്ധിപ്പിക്കാനും ഈ പച്ചക്കറികൾ സഹായിക്കും.
5. വാൽനട്ട്
ഫാറ്റി ലിവർ രോഗം കുറയ്ക്കാൻ ഏറ്റവും ഗുണം ചെയ്യുന്ന ഒന്നാണ് വാൽനട്ട്. ഉയർന്ന ആന്റിഓക്സിഡന്റും ഫാറ്റി ആസിഡും ഉള്ളതിനാലാണ് വാൽനട്ട് കരളിന് സംരക്ഷണം നൽകുന്നത്. ഒമേഗ -6, ഒമേഗ -3 ഫാറ്റി ആസിഡുകളും പോളിഫെനോൾ ആന്റിഓക്സിഡന്റുകളും ഇവയിൽ ഉണ്ട്.
Comments