ഓരോരുത്തരുടെയും ചർമ്മം ഓരോ തരത്തിലാണ്. ചിലരുടേതിന് എണ്ണ മയമാണെങ്കിൽ ചിലരുടേതിന് ഭയങ്കര വരണ്ടതായിരിക്കും. ചർമ്മത്തിന്റെ ഇത്തരം പ്രശ്നങ്ങൾ പരിഹരിക്കാൻ നാം പ്രധാനമായും ആശ്രയിക്കുന്നത് ആകട്ടെ വിവിധ തരത്തിലുള്ള ക്രീമുകളെയും.
പണ്ട് സ്ത്രീകൾ മാത്രമായിരുന്നു മുഖത്ത് ഇത്തരം ക്രീമുകൾ പുരട്ടിയിരുന്നത് എങ്കിൽ ഇന്ന് പുരുഷന്മാരും ഇതിന്റെ ഉപഭോക്താക്കളാണ്. പുരുഷന്മാർക്കായി പ്രത്യേക തരം ക്രീമുകളും ഇന്ന് വിപണിയിൽ ലഭ്യമാണ്. എന്നാൽ ഇവ ഉപയോഗിക്കുമ്പോൾ സ്ത്രീകളെക്കാൾ പുരുഷന്മാർ അൽപ്പം ശ്രദ്ധിക്കണമെന്നാണ് വിദഗ്ധർ പറയുന്നത്.
സ്ത്രീകളുടെയും പുരുഷന്മാരുടെയും ചർമ്മം വ്യത്യസ്തമാണ്. സ്ത്രീകളുടേതിനെക്കാൾ കട്ടി കൂടിയ ചർമ്മമാണ് പുരുഷന്മാരുടേത്. പുരുഷന്മാരിൽ തന്നെ ചർമ്മത്തിന്റെ രീതി വ്യത്യാസപ്പെടാറുണ്ട്. അതുകൊണ്ടുതന്നെ ചർമ്മത്തിന്റെ സ്വഭാവം അറിഞ്ഞു വേണം ക്രീമുകൾ തിരഞ്ഞെടുക്കാൻ.
ചർമ്മത്തിന് അനുയോജ്യമല്ലാത്ത ക്രീമുകൾ ഉപയോഗിക്കുന്നത് ഗുണത്തെക്കാളേറെ ദോഷമായിരിക്കും ഉണ്ടാക്കുക. അലർജിയ്ക്കും മറ്റ് ത്വക്ക് രോഗങ്ങൾക്കും ഇത് കാരണമായേക്കാം.
ക്രീമുകളിൽ സ്ത്രീകളും പുരുഷന്മാരും കൂടുതലായി ഉപയോഗിക്കുന്നത് മോയ്സ്ച്ചറൈസറുകളാണ്. ചർമ്മത്തിലെ പ്രശ്നങ്ങൾക്ക് ഏറ്റവും ആദ്യം പുരുഷന്മാർ ആശ്രയിക്കുന്നത് ഇതിനെയാണ്. എന്നാൽ എല്ലാ പ്രശ്നങ്ങൾക്കും മോയ്സ്ച്ചറൈസറുകൾ ഒരു പരിഹാരമല്ല. മോയ്സ്ച്ചറൈസറുകൾ അധികമായി ഉപയോഗിക്കുന്ന പുരുഷന്മാരിൽ ചർമ്മം കൂടുതൽ മൃദുവാകാൻ സാദ്ധ്യതയുണ്ട്. ഇത്തരം ക്രീമുകളിൽ ഈർപ്പം ധാരാളമുണ്ട്. ഇതാണ് ചർമ്മം മൃദുവാക്കുന്നത്. അതേസമയം പൊടിപടലങ്ങളിൽ നിന്നും ഇത് നമ്മുടെ ചർമ്മത്തെ സംരക്ഷിക്കുന്നു.
മോയ്സ്ച്ചറൈസർ ക്രീം പുരട്ടി വീണ്ടും അതിന് മുകളിൽ ക്രീം പുരട്ടുന്നവർ ഉണ്ട്. ഇത് ചർമ്മത്തിന് ഉചിതമായിരിക്കുകയില്ല. ഷേവ് ചെയ്ത ശേഷം പുരുഷന്മാർ മുഖത്ത് മോയ്സ്ച്ചറൈസർ പുരട്ടുന്നത് നല്ലതാണ്. ഇത് ചർമ്മം കൂടുതൽ തിളക്കമുള്ളതാക്കാൻ സഹായിക്കും.
എണ്ണമയമുള്ള ചർമ്മമുള്ളവർ മോയ്സ്ച്ചറൈസർ ക്രീമുകൾ ഉപയോഗിക്കേണ്ട ആവശ്യമില്ല. ഇത് ഇവരുടെ ചർമ്മം കൂടുതൽ എണ്ണമയമുള്ളതാക്കും. വെയിലത്ത് ഇറങ്ങിയുള്ള ജോലികൾ ചെയ്യുന്നവർക്ക് സൺസ്ക്രീൻ ക്രീമുകളും, ഇതടങ്ങിയ മോയ്സ്ച്ചറൈസറുകളും ഉപയോഗിക്കണം. ഇത് അൾട്രാ വയലറ്റ് രശ്മികളിൽ നിന്നും നമ്മുടെ ചർമ്മത്തെ സംരക്ഷിക്കുന്നു.
