ഒരാളുടെ ഏറ്റവും തിരക്കേറിയ സമയമാണ് രാവിലെ. അതിനാൽ തന്നെ ഒട്ടുമിക്ക ആളുകളും ഒഴിവാക്കുന്ന ഒന്നാണ് പ്രഭാത ഭക്ഷണം. ഒരു ദിവസത്തെ മികച്ച ആഹാരവും ഒഴിവാക്കാൻ പാടില്ലാത്ത ഒന്നുമാണ് പ്രഭാത ഭക്ഷണം. ഒരു ദിവസം മുഴുവൻ ഉൻമേഷവും ഊർജ്ജവും നിലനിർത്തുന്നതിന് പ്രഭാത ഭക്ഷണം കൂടിയേ തീരൂ. നമുക്കാവശ്യമുളള ഊർജത്തിന്റെ 40 ശതമാനവും പ്രഭാതഭക്ഷണത്തിൽ നിന്നുമാണ് ലഭിക്കുന്നതെന്ന കാര്യം ഭൂരിഭാഗം പേർക്കുമറിയില്ല.
ഉറങ്ങി എഴുന്നേൽക്കുന്ന ഒരാളുടെ ശരീരം ഉപവാസത്തിന് സമാനമായ അവസ്ഥയിലായിരിക്കും. ശരീരം 8 മുതൽ 10 മണിക്കൂർ വരെ ആഹാരം സ്വീകരിക്കാതെ ഇരുന്ന് ഊർജ്ജത്തിനായി കാത്തിരിക്കുന്ന സമയത്താണ് നമ്മൾ പ്രഭാത ഭക്ഷണം കഴിക്കുന്നത്.എന്നാൽ ഇത് ഒഴിവാക്കുന്നതിന്റെ ഫലമായി ദേഷ്യം, ഉത്കണ്ഠ എന്നിവ വരാനുള്ള സാദ്ധ്യത വളരെ കൂടുതലാണ്. ഒപ്പം വിട്ടുമാറാത്ത തലവേദനയും കൂടെ ഉണ്ടാകാനുള്ള സാദ്ധ്യതയുണ്ട്.
പ്രഭാതഭക്ഷണം ഒഴിവാക്കുമ്പോൾ തലച്ചോറിലെ കോശങ്ങൾക്ക് ആവശ്യമായ ഊർജം ലഭിക്കാതെ വരുന്നു. അലസതയും മന്ദതയും അനുഭവപ്പെടുകയും പെട്ടെന്നു തളർന്നു പോവുകയും ചെയ്യും. അതിനാൽ ഒഴിച്ചുകൂടാനാകാത്ത ഒന്നാണ് പ്രഭാത ഭക്ഷണമെന്നത്. ഉയർന്ന അളവിൽ പ്രോട്ടീൻ അടങ്ങിയ ആഹാരമാണ് രാവിലെ കഴിക്കേണ്ടത്. ഇത്തരത്തിൽ പ്രോട്ടീൻ ധാരാളമുള്ള ആഹാരം കഴിക്കുന്നത് വഴി രക്തത്തിലെ പഞ്ചസാരയുടെ അളവ് വർദ്ധിപ്പിച്ച് ഊർജ്ജമുള്ളവരാക്കി മാറ്റാൻ കഴിയും.
രാവിലെ ആഹാരം കഴിക്കാതിരുന്ന് പിന്നീട് ഉച്ചയ്ക്ക് കഴിക്കുമ്പോൾ അധികം ആഹാരം കഴിക്കാൻ സാദ്ധ്യതയുണ്ട്. ഇത് വഴി പൊണ്ണത്തടി വരാമെന്ന് പഠനങ്ങൾ വ്യക്തമാക്കുന്നു. ഭക്ഷണത്തിനിടയിൽ കൂടുതൽ ഇടവേളകളെടുക്കുന്നത് ഹീമോഗ്ലോബിൻ, കാൽസ്യം എന്നിവയുടെ അളവ് കുറയ്ക്കും. രക്തത്തിലെ ഗ്ലൂക്കോസിന്റെ അളവ്, എൽഡിഎൽ കൊളസ്ട്രോൾ, വയറിലെ പൊണ്ണത്തടി, ട്രൈഗ്ലിസറൈഡുകൾ എന്നിവയുടെ അളവിലും വ്യത്യാസം വരും. ആർത്തവ സംബന്ധമായ രോഗങ്ങൾക്കും പ്രഭാത ഭക്ഷണം ഒഴിവാക്കുന്നത് വഴി കാരണമാകും.
പെട്ടെന്നു ദഹിച്ച് ഊർജം നൽകുന്ന ഭക്ഷണയിനങ്ങളാണ് പ്രാതലിൽ ഉൾപ്പെടുത്തേണ്ടത്. പുട്ടിനോടൊപ്പം പയറോ കടലയോ ചേർത്തു കഴിച്ചാൽ അന്നജത്തിന്റെയും പ്രോട്ടീൻന്റെയും മിശ്രിത ഗുണം ലഭിക്കും.അരിയും ഉഴുന്നും ചേർത്തുണ്ടാക്കുന്ന ദോശയിൽ ആവശ്യത്തിന് അന്നജം അടങ്ങിയിട്ടുണ്ട്. ആവിയിൽ പുഴുങ്ങുന്ന ഇഡ്ഡലി, ഇടിയപ്പം തുടങ്ങിയവ പെട്ടെന്ന് ദഹിക്കുന്നവയും ഒപ്പം എണ്ണയുടെ അംശമില്ലാത്ത വിഭവങ്ങളാണ്. ഇഡ്ഡലിയും ദോശയുമൊക്കെ കഴിക്കുമ്പോൾ ചട്നിയേക്കാൾ നല്ലത് ധാരാളം പച്ചക്കറിയിനങ്ങൾ ചേർത്തുണ്ടാക്കുന്ന സാമ്പാറോ മറ്റു കറികളോ ആണ്. പ്രഭാത ഭക്ഷണത്തിൽ പഴങ്ങൾ, മുട്ട, ഓട്സ്, പഴച്ചാറുകൾ, പാൽ എന്നിവ ഉൾപ്പെടുത്തിയാൽ അത് കൂടുതൽ പോഷക സമ്പുഷ്ടമായിരിക്കും. ഇത്തരത്തിൽ മികച്ച് രീതിയിൽ ഭക്ഷണം ക്രമീകരിച്ചാൽ പൂർണ ആരോഗ്യത്തോടെ ഇരിക്കാനാകും.
Comments