ചുക്കില്ലാത്ത കഷായമില്ല എന്ന് പറയുന്നത് പോലെയാണ് മലയാളിക്ക് കറിവേപ്പിലയില്ലത്ത കറിയില്ല എന്ന പ്രയോഗവും. മലയാളിയുടെ സ്വന്തം നാട്ടുരുചികളിൽ ഒഴിവാക്കാനാകാത്ത സ്ഥാനമാണ് കറിവേപ്പിലക്ക് ഉള്ളത്. അടുക്കള പറമ്പിൽ നട്ടു വളർത്തുന്ന കറിവേപ്പിലയാണ് നാട്ടിൻപുറങ്ങളിൽ പ്രധാനമായും ഉപയോഗിക്കുന്നത്. എന്നാൽ അതിന് സൗകര്യമില്ലാത്ത നഗരപ്രദേശങ്ങളിൽ, പുറത്തു നിന്ന് വാങ്ങുന്ന കറിവേപ്പില മാത്രമാണ് ആശ്രയം.
പലപ്പോഴും മറ്റ് സംസ്ഥാനങ്ങളിൽ നിന്നും കൊണ്ടു വരുന്ന കറിവേപ്പിലയാണ് നമുക്ക് കടകളിൽ നിന്നും വാങ്ങാൻ കിട്ടുക. ദിവസങ്ങളോളം കേടുകൂടാതെ ഇരിക്കാൻ ഇവയിൽ കീടനാശിനികൾ തളിക്കുന്ന പതിവുണ്ട്. ശരിയായി വൃത്തിയാക്കാതെ ഇവ ഭക്ഷണത്തിൽ ഉപയോഗിക്കുന്നത് ആരോഗ്യത്തിന് ഹാനികരമാണ്.
കറിവേപ്പിലയിലെ വിഷാംശം കളയാൻ, ഒരു പാത്രത്തിൽ ലേശം വെള്ളമെടുത്ത് അൽപ്പം മഞ്ഞൾപ്പൊടി ചേർത്തിളക്കി അതിൽ കറിവേപ്പില മുക്കി വെക്കുക. ഏകദേശം പത്ത് മിനിറ്റെങ്കിലും ഇങ്ങനെ കറിവേപ്പില മുക്കി വെച്ച ശേഷം വെള്ളം ഉപയോഗിച്ച് വൃത്തിയായി കഴുകുക. ശേഷം ഫ്രിഡ്ജിൽ സൂക്ഷിക്കാവുന്നതാണ്.
