കൊതുകുകൾ ധാരാളമായുള്ള സമയമാണിത്. ഇവയുടെ ആക്രമണം മലേറിയ, ഡെങ്കു പോലെയുള്ള അസുഖങ്ങളെ വളരെ വേഗം ക്ഷണിച്ചു വരുത്തുന്നു. കൊതുകുകളെ തുരത്താൻ നമ്മൾ പല മാർഗങ്ങളും പരീക്ഷിക്കാറുണ്ട്. ഇവയിൽ പലതിലും അടങ്ങിയിരിക്കുന്ന കെമിക്കലുകൾ മനുഷ്യശരീരത്തിന് വളരെ അധികം ദോഷം ചെയ്യുന്നതാണ്. പ്രകൃതിദത്തമായും ഫലപ്രദമായും കൊതുകുകളെ തുരത്താനുള്ള ചില വഴികളെക്കുറിച്ച് ഇവിടെ വായിക്കാം.
* ആര്യവേപ്പിന്റെ എണ്ണ കൊതുകിനെതിരെയുള്ള ഫലപ്രദമായുള്ള മാർഗ്ഗമാണ്. വേപ്പെണ്ണ കെമിക്കൽ വേപ്പൊറൈസറുകളെക്കാളും കോയിലുകളെക്കാളും പത്ത് മടങ്ങ് ഫലപ്രദമാണെന്ന് പഠനങ്ങൾ തെളിയിച്ചിട്ടുണ്ട്. ഫംഗസ്, ബാക്ടീരിയ, വൈറസ് എന്നിവയ്ക്കെതിരെ പ്രവർത്തിക്കാൻ ആര്യവേപ്പിന് സാധിക്കും. വേപ്പെണ്ണയും വെളിച്ചെണ്ണയും അല്ലെങ്കിൽ വേപ്പെണ്ണയും ലാവെണ്ടർ ഓയിലും ഒരേ അനുപാതത്തിൽ ശരീരത്തിൽ പുരട്ടുന്നതും നല്ലതാണ്. എട്ട് മണിക്കൂർ വരെ ഇത് കൊതുകിൽ നിന്നും നിങ്ങൾക്ക് സംരക്ഷണം തരും.
* നാരങ്ങയും ഗ്രാമ്പുവും. നാരങ്ങ രണ്ടായി മുറിച്ചതിനു ശേഷം ഇതിനുള്ളിലേക്ക് കുറച്ച് ഗ്രാമ്പു കുത്തി നിർത്തുക. കൊതുകിനെയും മറ്റു ചെറുജീവികളെയും തുരത്താൻ ഉത്തമമാണിത്.
* നമ്മുടെ തൊടികളിലും മുറ്റത്തുമെല്ലാം സുലഭമായി ലഭിക്കുന്ന ഒന്നാണ് തുളസിയില. തുളസിച്ചെടി അല്ലെങ്കിൽ തുളസിയില മുറിക്കുള്ളിൽ വക്കുക. ഇതിന്റെ സുഗന്ധം കൊതുകിനെയും പ്രാണികളെയും അകറ്റി നിർത്തും. അതേപോലെ ജനലിന്റെ അഴികളിലും വാതിൽക്കലുമെല്ലാം പുതിനയുടെ ഇല വയ്ക്കുന്നതും നല്ലതാണ്.
* വെളുത്തുള്ളി ചതച്ചെടുക്കുക. ഇത് കുറച്ച് വെള്ളത്തിലിട്ട് തിളപ്പിച്ചെടുക്കുക. ഈ വെള്ളം കുപ്പിയിലാക്കി കൊതുക് കയറിവരുന്ന വഴികളിലും മുറിയിലുമെല്ലാം സ്പ്രേ ചെയ്യുക. വെളുത്തുള്ളിയുടെ രൂക്ഷഗന്ധം കൊതുകിനെ നിശ്ചയമായും തുരത്തും.
