ഉറുമ്പുകൾ.. വരിവരിയായി പട്ടാളക്കാരപ്പോലെ അച്ചടക്കത്തോടെ നീങ്ങുന്ന ഉറുമ്പുകളെ കണ്ടിട്ടില്ലേ? ദിനോസറുകൾ ഉണ്ടായ കാലം മുതൽ ഭൂമി കാണാൻ തുടങ്ങിയവരാണത്രേ അവർ.ലക്ഷക്കണക്കിന് എന്തിന് കോടിക്കണക്കിന് ഉറുമ്പുകളാണ് നമ്മളോടൊപ്പം ഈ ഭൂമിയിൽ ജീവിക്കുന്നത്. ഇത്രയേറെ ഉറുമ്പുകൾ ഉണ്ടെങ്കിലും എപ്പോഴെങ്കിലും ഇവയുടെ മുഖം എങ്ങനെയെന്ന് ഓർത്തിട്ടുണ്ടോ?
നഗ്ന നേത്രങ്ങൽ കൊണ്ട് തിരിച്ചറിയാൻ പറ്റാത്തത്ര ചെറുതാണ് ഉറുമ്പുകളുടെ മുഖം അത് കൊണ്ട് തന്നെ കാർട്ടൂണുകളിലൂടെയും ആനിമേഷൻ ചിത്രങ്ങളിലൂടെയും ഉറുമ്പുകളുടെ മുഖത്തിന്റെ ഒരു ഏകദേശചിത്രമാണ് നമ്മുടെ മനസിലുണ്ടാവുക. എന്നാൽ കഴിഞ്ഞ ദിവസം ഒരു ഫോട്ടോഗ്രാഫർ പുറത്തുവിട്ട ഉറുമ്പിന്റെ ക്ലോസപ്പ് ചിത്രങ്ങളാണ് ഇപ്പോൾ വൈറലാവുന്നത്. നമ്മൾ കാണുന്ന അത്ര പാവങ്ങളല്ല ഉറുമ്പുകൾ എന്നാണ് ചിത്രത്തിലൂടെ വ്യക്തമാകുന്നത്. ഏതോ ഭീകരജീവിയെ പോലെ ക്രൂരമുഖമാണ് ഇത്തിരിക്കുഞ്ഞൻ ഉറുമ്പുകൾക്ക്.
2022 -ലെ നിക്കോൺ സ്മോൾ വേൾഡ് ഫോട്ടോമൈക്രോഗ്രഫി മത്സരത്തിൽ വൈൽഡ് ലൈഫ് ഫോട്ടോഗ്രാഫർ യൂജെനിജസ് കവാലിയാസ്കാസ് ആണ് ഉറുമ്പിന്റെ ഫോട്ടോ അവതരിപ്പിച്ച് ശ്രദ്ധ നേടിയത്. മൈക്രോസ്കോപ്പ് ഫോട്ടോഗ്രാഫിയെ പ്രോത്സാഹിപ്പിക്കുകയും മനുഷ്യനേത്രങ്ങൾക്ക് കാണാൻ കഴിയാത്ത വിശദാംശങ്ങൾ പകർത്താൻ ആളുകളെ അനുവദിക്കുകയും ചെയ്യുന്നതിനാണ് ഈ മത്സരം സംഘടിപ്പിച്ചു വരുന്നത്.
തിരഞ്ഞെടുത്ത 57 ചിത്രങ്ങളിൽ ഒന്നായിരുന്നു ഉറുമ്പിന്റെ മുഖത്തിന്റെ ചിത്രം. ചുവന്ന കണ്ണുകളും സ്വർണ്ണ നിറത്തിലുള്ളകൊമ്പുകളും ഇതിൽ വ്യക്തമായിരുന്നു. മൈക്രോസ്കോപ്പിൽ അഞ്ച് തവണ വലുതാക്കിയിരുന്നു ചിത്രം.
