ഓൺലൈൻ ഷോപ്പിംഗ് ഡെലിവറികൾ സുഗമമാക്കാനൊരുങ്ങി ഗൂഗിൾ. ഡെലിവറി ട്രാക്ക് ചെയ്യുന്നത് എളുപ്പമാക്കാൻ പുതിയ ടൂൾ അവതരിപ്പിക്കാൻ ഒരുങ്ങുകയാണ് ജിമെയിൽ. ഉപയോക്താക്കളുടെ സമയം ലാഭിക്കുന്നതിനും എല്ലാ ഷിപ്പ്‌മെന്റുകളുടെയും ട്രാക്കിംഗ് സൂക്ഷിക്കാൻ സഹായിക്കുന്നതിനും ജി മെയിലിൽ പുതിയ ഫീച്ചറുകൾ ഉൾപ്പെടുത്താനാണ് നീക്കം. ഓർഡറുകൾ ട്രാക്ക് ചെയ്യാനും ഉപയോക്താക്കളുടെ ഇൻബോക്സിൽ തന്നെ ഡെലിവറി വിശദാംശങ്ങൾ പ്രദർശിപ്പിക്കാനും ഇതോടെ ജിമെയിലിന് കഴിയും. തങ്ങളുടെ ഉപയോക്താക്കളെ സജീവമായി തന്നെ നിലനിർത്താനാണ് പുതിയ മാറ്റങ്ങളുമായി ഗൂഗിൾ എത്തുന്നത്.
ട്രാക്കിംഗ് നമ്പറുകളുള്ള ഓർഡറുകളും അവയുടെ ഡെലിവറി വിരങ്ങളും ഉപയോക്താവിന്റെ ഇൻബോക്സ് ലിസ്റ്റിൽ കാണിക്കും. കൂടാതെ, ഉപയോക്താക്കൾക്ക് ലിസ്റ്റിൽ സമ്മറി കാർഡും നിലവിലെ ഡെലിവറി നിലയും പരിശോധിക്കാൻ സാധിക്കും. ഭൂരിഭാഗം യുഎസ് കാരിയറുകളുമായും ഈ പുതിയ ഫംഗ്ഷൻ പരീക്ഷിക്കാൻ ഗൂഗിൾ തയ്യാറാണ്. മറ്റ് വിപണികളിലേക്കും സേവനം വ്യാപിപ്പിച്ചേക്കും. ജിമെയിലിലെ പാക്കേജ് ട്രാക്കിംഗ് ഫംഗ്ഷൻ പരിശോധിച്ചാൽ ഡെലിവറിയ്‌ക്കായി എടുത്ത സമയവും മറ്റ് വിവരങ്ങളും ലഭ്യമാകും.
ഡെലിവറി സംബന്ധിച്ചുള്ള വിവരങ്ങൾ ഒറ്റ നോട്ടത്തിൽ തന്നെ വ്യക്തമാകുന്ന തരത്തിലായിരിക്കും പുതിയ സംവിധാനം. ഷിപ്പ്‌മെന്റ് ട്രാക്കിംഗ് വിവരങ്ങൾ ലഭിക്കുന്നതിന് ഉപയോക്താക്കൾ അവരുടെ ജിമെയിലിന്റെ സെറ്റിംഗ്സ് അപഡേറ്റ് ചെയ്യേണ്ടതുണ്ട്. ട്രാക്കിംഗ് നമ്പറുകൾ ഉപയോഗിച്ച് ഓർഡർ അപ്ഡേറ്റുകൾ ഇമെയിൽ സ്വയം തിരയുമെന്നും, ഉപയോക്താവിന്റെ ഇൻബോക്സിൽ ഇത് പ്രദർശിപ്പിക്കുമെന്നും ഗൂഗിൾ പറയുന്നു. ഈ നോട്ടിഫിക്കേഷൻ വേണമെങ്കിൽ ഉപയോക്താക്കൾക്ക് ഓഫാക്കാനും സാധിക്കും.
